Tula aculhirà un nòu festenal d’expressions occitanas del 1r al 4 de junh de 2016.  nomenat Balad’òc Tula, l’eveniment es organizat per mai d’una organizacion del país de Tula. “Aquela idèa, que pòt semblar estranha, a una realitat dins lo quotidian de las gents. Quauquarren va emergir d’aqueu movement qu’esperam perenne”, çò explicava Josiana Brassac-Dijoux durant la presentacion que rapòrta La Montagne.
 
Al programa an previst de projeccions de cinèma e de documentaris, d’exposicions, de conferéncias e de concèrts. Cal remarcar la preséncia dels conferencièrs Luc de Goustine e Alem-Surre Garcia e las seradas de concèrts amb San Salvador e Nadau.
 
En mai d’aquò, a partir del 15 de junh lo festenal d’expòrta a Selhac amb qualques jorns suplementaris.
 
 

fffff		fffff
	Las expressions occitanas lemosinas e carcinòlas s’enraijan au còp dins de las originas sabentas e popularas. Se tornan trobar dins la produccion literària dempuei Bernat de Ventadorn (sègle XII) d’aicí au chanonge Ros, tant coma chas Marcèla Delpastre. Tanben dins los toponims: de l’Auselon au Pont de l’Escuròl. Dins la practica culinària: la flaunharda e lo clafotís, los tortons, las farciduras e autres milhassons. Son presentas dins la realitat culturala: de las conferéncias au cafè occitan, dins los noms de las danças, las chançons e de segur dins las tradicions ruralas d’aicí a l’arquitectura quitament ciutadina.   Emb aqueu primier festenau volèm butir endavant l’èime de la ciutat tulauda per valorizar, far descobrir o tornar far descobrir la cultura e l’occitan de Lemosin e de Carcin en nos apiejant sus las fonts seguras de la civilizacion portada per los trobadors, que Lemosin n’es lo brèç e lo floron.   En federar totas aquelas energias, desiram botar en valor la creacion lemosina, carcinòla, bearnesa, per promòure aqueu patrimòni locau dins una dobertura de tolerància e d’universalitat.   Aquilhs moments de balada, de fèsta, de descobèrta, de partiment se tendràn dau 1r de junh au 4 de junh venents, en la mediatèca, dins la Sala de l’Auselon, dins lo Trech, Cai Baluze, sus los merchats, mas tanben dins d’autras comunas dau territòri de Tula Aglomeracion.   Dins lo  temps d’aquilhs quatre jorns, convidam totas las generacions, totas las sensibilitats de totas originas a nos venir donar de veire, d’auvir, d’utilizar, de s’apropriar o de se tornar apropriar aquela lenga e aquela cultura emb plaser e fiertat: Tenham-nos fièrs!         Josiana Brassac-Dijoux, Adjoncha au cònsol en charja de l’environament