Jeremy Buckingham es un òme politic australian que ven de demostrar los risques de la fracturacion idraulica —o fracking—, una tecnica agressiva per extraire de gas de sistre e quitament de petròli. Coma podètz veire sul vidèo, a alucat l’aiga del riu Condamine, a un quilomètre de distància d’un sit ont tres societats fan d’extraccions amb aquel metòde. Lo gas metan que s’extrai se filtra dins lo riu, e per tant se pòt abrar l’aiga.
 

 
Lo procediment del fracking consistís a injectar d’aiga e de sabla sota pression dins lo terren per fin d’alargar las fracturas existentas dins lo substrat rocós que conten lo gas o lo petròli e per ne facilitar l’extraccion. S’agís d’una tecnica emplegada dins aperaquí lo 60% dels poses extractius del Mond, e l’usatge s’espandís als Estats Units.
 
Lo govèrn francés adoptèt la lEi Jacob, en julhet de 2011, qu’enebís l’esplecha d’idrocarburs liquids o gasoses per fracturacion idraulica; e aboliguèt los permeses exclusius de recèrcas per de projèctes qu’empleguèsson aquela tecnica. Mas las indústrias fan pression contra aquela lei.
 
 
Espanha empacha l’enebicion del fracking en Catalonha
 
En Catalonha lo fracking es enebit segon una lei aprovada pel Parlament de Catalonha. Ça que la, lo Tribunal Constitucional espanhòl ven de declarar inconstitucionala aquela lei, coma tantas autras leis catalanas. La cort espanhòla considèra que las leis environamentalas de l’estat se devon impausar sus las leis “autonomicas”. Pasmens, lo govèrn catalan s’es engatjat a enebir lo fracking en Catalonha e Aran.