De milièrs de personas correguèron dimenge passat lo Maraton de Londres, una de las corsas mai multitudinàrias e popularas del Mond. Mas l’atencion dels mèdias, quitament abans l’eveniment, l’aviá atirada l’astronauta Tim Peake. El se tròba dempuèi decembre passat dins l’Estacion Espaciala Internacionala (ISS) e participèt a la corsa de l’espaci estant.
 
Per o far, Peak empleguèt un tapís corredor e un iPad que li mostrava la rota del temps que los autres esportius o fasián per carrièras dins la capitala anglesa. En mai d’aquò, se metèt en marcha una aplicacion mobila per qu’òm poguèsse córrer virtualament amb l’astronauta un tròç d’aquel maraton.
 
Es pas lo primièr còp qu’un astronauta de l’Estacion Espaciala Internacionala cor un maraton. En 2007 l’estatsunidenca Sunita Williamscorreguèt de l’espaci estant lo maraton mai famós de la planeta, lo de Boston, en 4 oras e 24 minutas. En mai d’aquò, Williams completèt tanben lo Nautica Malibu Triathlon en 1 ora e 48 minutas dins una autra mission en 2012. Per aquò far, li calguèt córrer sul tapís, anar en bicicleta estatica e simular que nadava amb una maquina de far fòrça.