Regions e Pòbles Solidaris (RPS) a decidit de sosténer la candidatura de Christian Troadec a l’eleccion presidenciala de 2017. La federacion dels partits regionalistas o sobeiranistas de Corsega, Occitània, Bretanha, Catalonha, Bascoat, Alsàcia e Arpitània precisa qu’ara es “lo sol camin capable de refondar la democracia e de modernizar la Republica [francesa] per li permetre deman d’obrar a la construccion d’una Euròpa plenament democratica, per tal de respondre a la crisi economica, ecologica e politica que patissèm”. RPS organizèt una conferéncia de premsa a París, en preséncia de Christian Troadec, per anonciar aquela causida.
 
Lo president d’RPS, l’auvernhat Gustau Aliròl, explica qu’aquel sosten marca una volontat de metre dins lo debat electoral la question d’una vertadièra regionalizacion. Segon Aliròl, “venèm de viure una reforma regionala sabrada, qu’a pas tengut compte de las populacions e qu’en realitat es una recentralizacion”.
 
De son costat, lo bearnés Dàvid Grosclaude, vicepresident de l’Aliança Liura Europèa e cap de campanha d’RPS, afirma que “Christian Troadec serà lo candidat de tots los qui n’an pro deu centralisme qui ns’escana. Que n’i a pro de’ns har créder que caminam cap a la descentralizacion mentre que desempuish qualques annadas que vedem que i a ua recentralizacion.”
 
Grosclaude dirigirà la campanha del candidat breton: “Que sostieni a Christian Troadec e qu’èi acceptat d’assegurar la direccion de la soa campanha”, çò a publicat Grosclaude sus son Facebook en tot apelar “tots los qui son estacats a la question de la diversitat lingüistica e aus drets de la nosta lenga a har conéisher la candidatura de Christian Troadec”.
 

 
 
Una candidatura basada suls diferents movements regionalistas
 
Menaire del movement civic breton dels Bonets Roges, cònsol de la comuna de Karaez e conselhièr departamental de Finistèrra, Christian Troadec decidiguèt arunan d’entamenar una candidatura regionalista a l’eleccion presidenciala francesa. Percorrèt las nacions minorizadas de la Republica Francesa per amassar d’opinions e de sostens en tot bastir una candidatura basada suls diferents movements regionalistas o nacionalitaris per menar aquela sensibilitat al mièg del debat de çò qu’el nomena “una eleccion màger”. La tòca es d’aténher que lo fach nacionalitari venga un tèma de debat politic e d’ofrir una alternativa electorala a de desenats de milièrs de votants potencials qu’a l’ora d’ara an pas cap de partit per lo qual votar.
 
 
La sortida de la crisi dins lo respècte de l’identitat dels pòbles
 
Arunan, a la presentacion de sa campanha, Troadec jutgèt qu’es “urgent d’alandar las pòrtas e las fenèstras de la regionalizacion per airejar e vivificar los territòris e desliurar las energias. La sortida de la crisi passarà per la regionalizacion e lo dinamisme dels territòris dins lo respècte de lor identitat”.
 
Vendrà al breton de portar a l’eleccion presidenciala las paraulas regionalistas. Desenant sembla segur que sa dintrada dins l’espaci politic a l’escala de l’estat francés cambiarà los equilibris e los acòrdis tradicionals entre los movements mal nomenats regionals e los partits exagonals. Naturalament Troadec representarà lo país d’Occitània e los autres païses dins l’estat francés. 


Sosten de Jornalet
 
Jornalet publiquèt arunan un editorial en sosten a la candidatura de Troadec. Dins aquel article, la còla de Jornalet exprimiguèt son sosten absolut a aquela iniciativa e encoratjava l’occitanisme politic a establir una aliança estrategica per sosténer aquel projècte. Per aqueste jornal “una candidatura regionalista dins una eleccion presidenciala francesa metrà la question nacionala, culturala e lingüistica sus la taula del debat politic e chepicarà los grands partits franceses. A l’encòp, permetrà una amadurança de totes los movements politics regionals, l’occitan comprés, de la meteissa faiçon que la candidatura falhida de Robèrt Lafont permetèt, almens, la creacion d’un ret territorial occitanista que donèt divèrses fruches organizatius”.