Se debanèt ièr dins tot l’estat francés de manifestacions de protèsta contra la reforma del còde del trabalh, la nomenada lei El-Khomri, que desboquèt sus de violéncias. Los manifestants, que seguissián l’apèl dels sindicats e de las associacions d’estudiants, mostrèron un còp de mai lor refús d'aquela lei. Son de protèstas que se debanan dempuèi qualques meses e qu’an creat lo movement dels indignats nomenat Nuèch de Pè (Nuit Debout).
 
En Occitània, aperaquí 6000 personas se mobilizèron a Tolosa e a Bordèu segon los organizaires. Tanben Montpelhièr, Nimes, Avinhon e d’autras vilas del país vegèron de manifestacions nombrosas, mas es benlèu a Marselha que las protèstas foguèron mai amplas (20 000 personas segon La Provence). Las protèstas s'acabèron pertot amb d’afrontaments entre policièrs e manifestants, e i aguèt d’interpelacions.
 
En Bretanha la violéncia foguèt especialament fòrta. A Roazhon, los afrontaments entre policièrs e manifestants provoquèron qu’un jove estudiant de 20 ans foguèsse ferit a l’uèlh. Evacuat per los socorses, lo jove foguèt operat d’urgéncia a l’espital, mas es possible que pèrda son uèlh. I aguèt tanben de violéncias a Nantas, Grenòble e París.
 
 
La reforma del còde del trabalh
 
Dins la linha de çò que marca la tròica, aquela reforma ditz voler “protegir los salariats, favorir l’emplec e donar mai de marge de manòbra a la negociacion en entrepresa”. Dins la practica, manten la setmana de 35 oras, mas facilita los licenciaments, permet d’esperlongar la durada de la jornada de trabalh sens besonh d'acòrdi amb los trabalhadors, e permet de far demenir la remuneracion de las oras suplementàrias.
 
Los sindicats refusan quitament la nòva version que lo primièr ministre Manuel Valls presentèt lo 14 de març passat, en seguida de fòrça protèstas e d'una autra jornada de cauma generala que mobilizèt mai de 250 000 personas segon los principals mèdias. Aquela rescritura a pas convencut los sindicats: la CGT e l’UNÈF mantenon lor oposicion. En mai d’aquò, lo patronat, representat pel MEDÈF, qu’èra en favor del nòu projècte de lei, ara se ditz decebut.
 
Valls presentèt una version “corregida” de sa proposicion de lei, coneguda coma “Lei Trabalh” o “Lei El Khomri”, amb qualques cambiaments. Lo mai remarcable seriá que lo barèm que deu limitar las indemnitats per licenciament serà solament “indicatiu”.
 
 
De protèstas per tot l’estat francés
 
Las protèstas qu’a generat aquela reforma culminèron lo 31 de març en una cauma generala. A partir d’aquel moment, se quilhèt lo movement nomenat Nuèch de Pè (Nuit Debout), que dempuèi lo 31 de març ocupa la Plaça de la Republica de París, s’estend per tot l’estat francés e quitament a Brussèlas, Berlin, Madrid, Saragossa e qualques vilas dels Païses Catalans. L’iniciativa amassa de milièrs de joves que cada jorn arriban a las plaças amb los afars per campar e s’organizar en assembladas e comissions.
 
En Occitània lo movement es arribat almens a Avinhon, Bordèu, Clarmont, Lemòtges, lo Telh, Marselha, Montpelhièr, Niça, Nimes, Pau, Rodés, Tolosa, Tula, Valença e Vilafranca de Roergue.
 
La protèsta seguís la cauma generala del 31 de març passat per protestar contra la reforma del còde del trabalh, la dicha Lei El-Khomri, e aquela cauma se tenguèt jos la crida dels principals sindicats interprofessionals, de qualques organizacions d’estudiants e de fòrça collectius. Pasmens, los manifestants ocupan las plaças e i demòran de nuèch, dreches, de pè, tanben per protestar contra l’estat d’emergéncia e d’autras luchas socialas. Per tant, lo movement es vengut una convergéncia dels movements ecologistas, antimilitaristas e d’autres ciutadans malcontents e decebuts a causa de las politicas del govèrn de Manuel Valls; que denóncian quatre ans de mesuras liberalas e reclaman un cambiament. 


Tuits sobre #manif28avril OR #loitravailnonmerci OR #onvautmieuxqueca