La recèrca scientifica pòu, de còps que i a, aver d’aplicacions completament inesperadas. Es antau que, se podètz encuei legir Jornalet sus lo web, es perque lo CÈRN (Organizacion Europèa per la Recèrca Nucleara) a distribuat publicament lei logiciaus dau World Wide Web lo 30 d’abriu de 1993, fa exactament 23 ans. Segur, lo protocòl Internet existissiá ja despuei 1982 per lei besonhs de la comunautat scientifica, mai es lo britanic Berners-Lee, emplegat per lo CÈRN, que creèt l’HTTP l’HTML e lo primier navigador. Es a dire leis elements emblematics d’Internet dau vejaire dau grand public.
 
Es pas la soleta aplicacion dei recèrcas en fisica dei particulas. Una autra aplicacion majora foguèt l’utilizacion deis acceleradors de particulas per la recèrca en biologia, en medecina e per la radioterapia. E tanben se pòu parlar de la tomografia muonica, que foguèt utilizada per exemple per analisar l’interior dei piramadas. Pasmens, la creacion dau World Wide Web es clarament l’aplicacion amb la mai granda influéncia sus nòstra vida vidanta. Uei lei capacitats d’escambi de donadas informaticas son encara una question critica per lo foncionament de l’LHC (Grand Collisionador d’Adrons), que deu disseminar de centenas de teraoctets de mesuras per leis analisar dins lei diferents laboratòris dau Mond.
 
 
 
Julien Frison