Ar Redadeg ("la corsa", en breton) comencèt divendres passat près de la capitala istorica de Bretanha, Nantas, en una nòva edicion d’aquela corsa de relèus en favor de la lenga bretona. La corsa vòl “simbolizar la transmission d’una lenga bretona viva, creativa e dinamica”, çò ditz l’organizacion d’Ar Redadeg, e collectar de fonzes per las iniciativas en favor de la lenga.
 
Es la cinquena edicion d’una corsa qu'a luòc cada dos ans dempuèi 2008. Ongan la corsa partís de Sant-Ervlan e finirà lo 7 de mai a Lokoal-Mendon. Pendent los nòus jorns que durarà —sens s’arrestar de nuèch—, Ar Redadeg percorrerà los cinc departaments bretons, en i comprenent lo de Léger Atlantic, que fa partida oficialament de la region dels Païses de Léger.
 
Lo finançament s’obten amb la venda de quilomètres. Per 100 èuros, las personas individualas e las associacions ne pòdon crompar un. A las municipalitats e a las entrepresas lor demandan 200 èuros per quilomètre. Just abans de començar l’edicion d’ongan, se n’èran venduts mai de 1600, gaireben la totalitat dels disponibles.
 
La darrièra edicion d’Ar Redadeg, celebrada en 2014, amassèt 165 000 èuros, dont 125 000 se destinèron, entre d’autras tòcas, a ajudar las escòlas associativas immersivas en breton (Diwan) e a finançar de projèctes ludics, de teatre e d’ensenhament de breton pels adultes. Los autres 40 000 demorèron per l’organizacion de l’edicion 2016.
 
 
 
 
<hr align="left" size="1" width="33%" />
Aquesta nòva es adaptada de Nationalia amb qui Jornalet a un acòrdi de cooperacion