Jean-Claude Mas, fondador de la societat Poly Implant Prothèse (PIP), foguèt condemnat ièr a quatre ans de preson ferma en apèl a Ais de Provença, çò rapòrtan 20 Minutes e La Provence. Atal, la cort sestiana li confirmèt la condemnacion a quatre ans de preson per la venda d’aquelas protèsis.
 
La cort confirmèt tanben la culpabilitat d'autres quatre dirigents de l’entrepresa, condemnats a de penas de fins a tres ans de preson, dont un an per l’èx-director financièr de PIP, Claude Couty.
 
 
L’escàndol de las protèsis PIP
 
L’escàndol de las protèsis esclatèt en 2010. Cinc dirigents de PIP, valent a dire, Jean-Claude Mas e los autres quatre dirigents, foguèron jutjats en març de 2013 al Pargue Chanòt de Marselha dins un jutjament eccepcional, per aver emplegat de gèl industrial per far de protèsis de popa de silicòna, çò qu’afectèt 500 000 femnas.
 
Lo grand procès comprenguèt las 5 127 clamantas e gaireben 300 avocats, e se debanèt dins un espaci pas brica abitual. Pr’amor de sas grandas dimensions, la justícia loguèt un airal de 4 800 mètres cairats del Pargue d’Exposicions Chanòt, a Marselha, per 800 000 èuros.
 
Jean-Claude Mas escapava dels contraròtles sanitaris de las autoritats francesas e europèas en emplegant un gèl industrial e non pas de silicòna sanitària, per fin d’estalviar d’argent. Segon los expèrts, PIP fasiá servir un gèl industrial illegal que costava 1,65 èuro per implant, en luòga d’emplegar de gèls certificats que còstan 11,55 èuros. Aquò supausèt per PIP un profièch suplementari d’un milion d’èuros per cada 100 000 implants fabricats.
 
En març de 2010, las autoritats sanitàrias francesas enebiguèron l’utilizacion de las protèsis PIP après divèrses cases de rompeduras. A la fin de 2011, aquel meteis organisme recomandèt de retirar totes los implants de PIP. Cal dire, pasmens, que PIP obteniá 84% de son profièch en defòra de l’estat francés, mai que mai de l’America del Sud.