Comença uèi a Quilhan (Rasés) lo 29n Congrès de Calandreta qu’ongan a per tèma “Soi a Calandreta, sèm un movement”. Aquel congrès, organizat per la Confederacion de las Calandretas, amassa cada dos ans los parents e los professors amb la tòca de definir ensems las orientacions de prene, las actualizacions e los melhoraments de realizar, las novetats de metre en plaça.
 
“Calandreta grandís: ara sèm 62 escòlas e 3 collègis e l’espandiment se perseguirà de segur”, çò ditz Joan-Loís Blenet, president de Calandreta. “Calandreta càmbia e se deu pensar de mai en mai coma un movement d’ensenhament per l’escolaritat tota, de la mairala al licèu. Del còp la plaça pel segondari, que ven una tòca majorala, pojarà bravament”. En mai d’aquò, Blenet precisa la tòca del congrès e del collectiu: “definir amassa, d’un biais cooperatiu, cossí prene en carga los cambiaments, melhorar lo trabalh e la plaça de cadun”.
 
Pendent quatre jorns, una seguida de talhièrs, escambis, conferéncias, rescontres, mòstras e filmes enriquirà lo movement de las Calandretas. Aquel programa se completa amb l’assemblada del collectiu, mas tamben amb d’animacions, de cantas, de musica, de teatre e fòrça activitats pels enfants.
 
Lo congrès de las Calandretas vòl ramentar ongan que son dins las piadas del pedagòg Celestin Freinet e d’una practica cooperativa de la pedagogia. Aquela practica es constitutiva de Calandreta dempuèi lo començament e es marcada dins la carta magna del movement. Per tant, organizan tanben la formacion dels regents.
 
Fa qualques ans, a Maurs (Castanhau), se debanava un congrès en 2002 que definissiá l’estructura de las Calandretas: "S’associar per far escòla". E en seguissent aquela dralha son a trabalhar amassa sus la pedagogia per n’estudiar lo desvolopament al segondari qu’es la seguida logica de las escòlas.
 
 
D’escòlas associativas en occitan
 
Las escòlas Calandretas, escampilhadas per tota Occitània, son d’escòlas laïcas e associativas qu’an un contracte amb l’estat, qu’emplegan la lenga occitana coma lenga veïculara sul programa educatiu fixat pel Ministèri de l’Educacion de França. La relacion entre los professors e las familhas es fòrça estrecha e los parents se pòdon engatjar dins lo projècte fins ont vòlgan. E mai, cada Calandreta a una estrecha relacion amb son entorn immediat, e aital la coneissença de la realitat pròcha e l’engatjament dels escolans amb l’entorn son plan elevats.
 
A l’ora d’ara, Occitània compren 62 escòlas primàrias Calandretas e mai 3 collègis Calandretas a Pau, Tolosa e Montpelhièr.