França melhorarà la situacion dels gitanos (o ròms) de l’Èst d’Euròpa, provenent majoritàriament de Romania e de Bulgaria, e lor facilitarà l’accès al trabalh e a la residéncia.

Es aital que lo govèrn socialista francés se desmarca de la politica de Sarkozy e que complís una de las siás promessas electoralas: flexibilizar las mesuras que limitavan fins ara l’accès al trabalh dels ròms per ne melhorar l’integracion.
 
En concret, lo govèrn Ayrault eliminarà la taxa qu’als entrepreneires, lor caliá pagar se contractavan un d’aqueles trabalhadors; tanben agrandirà la lista dels 150 mestièrs que podián far fins ara.
 
Ça que la, Hollande contunharà de menar a tèrme una de sas accions mai polemicas: la percaça e lo desmantelament dels campaments illegals. Lo govèrn francés o farà cada còp que la justícia o decidisca.
 
La question de traire qualques restriccions, que son en vigor fins a la fin de 2013 e qu’empedisson la lor plena integracion dins lo mercat del trabalh, se discutirà amb los govèrns de Romania e de Bulgaria, segon un comunicat del govèrn francés. La decision a satisfach las associacions umanitàrias que trabalhan amb los gitanos.
 
La Comission Europèa a saludat aquelas mesuras mas a encoratjat França a traire lo pus lèu possible las restriccions que son encara en vigor.
 
La question dels ròms afrontèt Brussèlas amb París fa dos ans quand lo president francés d’alavetz, Nicolas Sarkozy, decidiguèt la percaça e la repatriacion massissa dels gitanos.