Un atac aerian contra un camp de desplaçats intèrnes de la guèrra civila siriana daissèt un trentenat de mòrts, segon çò que rapòrtan divèrses mèdias. Se tracta del camp d’Al Kamuna, al nòrd de la governacion d’Idlib, a qualques quilomètres de la frontièra turca. Se desconeis encara qual a fach lo bombardament. Las victimas avián fugit los combats de l’airal d’Alèp ont dijòus comencèt una alta al fuòc de 48 oras entre las fòrças del govèrn e los grops opausants, mas sens implicar los jihadistas.
 
Dins un vidèo distribuit suls rets socials just après l’atac, se pòt verificar la destruccion causada per las bombas. Demièg las rèstas de las tendas, se pòt veire los pompièrs que son a trabalhar al secors de las victimas e qu’amòrçan los fuòcs.
 
Se calcula que dins aquel airal frontalièr i a aperaquí 150 000 desplaçats intèrnes —700 000 dins tota la governacion— e qu’an l'intencion de se refugiar en Turquia. Mas lo govèrn d’Ankara a barrat la frontièra en essent consent amb lo tractat antirefugiats qu’a signat amb l'Union Europèa.
 
L'Ostal Blanc a condemnat l’atac. Son pòrtavotz Josh Earnest a manifestat qu’“aquelas personas se tròban dins una situacion inimaginabla de desespèr e i a pas cap de justificacion de los atacar militarament”.