Sadiq Khan es vengut lo primièr cònsol màger musulman de la comuna de Londres. Khan, del partit trabalhista, s’es impausat après lo doble escrutini que prevei lo sistèma de vòte londinenc. Dins lo primièr comptatge dels vòtes foguèt lo candidat mai votat amb lo 44% dels vòtes, seguit del candidat conservator Zac Goldsmith, qu’obtenguèt lo 33%. Pr’amor que cap dels dos candidats arribèt pas al 50% dels sufragis, calguèt far un segond escrutini, en prenent en compte la segonda opcion causida pels elegeires. Atal Khan es doncas estat proclamat cònsol màger, e remplaçarà lo conservator Boris Johnson al conselh municipal de la capitala britanica.
 
Sadiq Khan, d’origina paquistanesa e filh d’un menaire d’autobuses de la capitala britanica, serà ansin lo primièr cònsol musulman d’una grand capitala occidentala. Los conservators an perdut après una campanha polemica ont acusèron Khan, un avocat en dreches umans, d'aver de ligams amb de musulmans “extremistas”.
 
Campanha polemica
 
Lo primièr ministre britanic, David Cameron, assegurèt en una intervencion a Westminster que Khan aviá “aparegut un còp e un autre” dins d'eveniments publics amb d’extremistas. Segon Cameron, Khan s'èra retrobat amb Suliman Gani, un òme religiós del districte de Tooting, al sud de Londres, que, çò diguèt lo primièr ministre, sosten l’Estat Islamic. Khan respondèt sus Twitter per afortir qu'aviá luchat contra l’extremisme tota la siá vida.