Campionat: E Soubeyras encapetèt lo tombat decisiu!
 
Dissabte, sul cocarèl estadi de Fois, se jogavan las mièjas finalas del campionat d’Elèit 1.
 
Dins la primièra partida, Limós mai realista capitèt de prene lo pas sus Lesinhan que vendemièt tròp de palmas: 22-18.
 
D’una autra farina, foguèt la mièja finala entre Carcassona e Dragonets: cardiacs, demoratz a l’ostal e bevètz tisana de verbena!
 
Alexis Escamilla marcava lo primièr ensag de la partida, mas, aprèp una 40-20, Sigismeau replicava pels catalans. Una passa crosada entre Anderson e Gressèque destabilizava la defensa catalana e Peacock mandava tornar Escamilla darrièr la linha. Del canton, Maxime Gressèque, qu’aviá rajustat una penalitat a la culhida audenca, transformava: 12-4 a la pausa pels Canaris.
 
Lo combat montèt en intensitat dins lo segond temps. Doas penalitats novèlas (46ena e 58ena) de Gressèque noiriguèron l’avança carcassesa: 16-4. Mas Sigismeau tornava marcar a 5 minutas de la fin, e Marginet passava la transformacion malaisida: 16-10. Sul darrièr balon, l’arbitre vesiá Robin puntar l’ensag catalan al pè dels pals. Amb la transformacion, aquò fasiá egalitat a 16 punts e l’obligacion de passar per l’espròva terribla del punt en aur (la mòrt aviada).
 
St-Estève-XIIICatalan engatgèt, los avants carcasseses tornèron montar la palma. Carcassona beneficièt de doas cadenas consecutivas, la defensa catalana pensèt empachar lo còp de pè de Gressèque, mas la pauma arribèt dins las mans de l’arrièr Soubeyras que trantalhèt pas per mandar un improbable tombat entre los pals e l’ASCarcassona segurament en finala: 17-16!
 
Lo dissabte 21 de mai, Carcassona e Limós se tornaràn trapar sus la pelena de l’Estadium d’Albi. E d’unes se sovendràn de la finala de 68 que los Roge e Negre ganhèron aprèp prolongacion 13-12; una desfaita qu’es encara de mal engolir al pè de Ciutat.
 
En dobertura, se jogarà la finala dels juniors entre Avinhon (venceire de Tolosa: 45-26) e St-Estève mai fòrt que Limós (51-20).
 
En Elèit 2, la finala (que se jogarà dimenge de vèspre a Lesinhan) opausarà la Reula (victòria 20-18 sus Sent-Gaudenç) e Lescura que l’empòrta just fàcia a Vilafranca: 25-24.
 
 
La Cup cambiarà de proprietari
 
Tre divendres, se saupèt qu’un nom novèl seriá marcat sus la Cup 2016: lo venceire 2015 Leeds pleguèt a Huddersfield 36-22. Los Dragons catalans se qualifiquèron sens tremolar sul terrenc en penda dels Dògols de Batley (Championship) 40-4.
 
Los autres afrontaments de formacions de super-Liga vegèron las qualificacions de Castleford (34-18, contra Salford) e d’Hull-FC, victoriós 47-18 a St-Helens.
 
Dins los rescontres Super-Liga/Championship, Warrington ganha a Oldham (70-10) , Wigan l’empòrta a Dewsbury 54-4, Halifax resistís a Widnes 18-28.
 
Dimenge, Tolosa se defend plan a Wakefield: desfaita 40-22.
 
Los quarts de finalas son programats pels 25 e 26 de junh. Malasòrt pels Dragons qu’anaràn desfisar lor bèstia negra Hull-FC: una gròssa partida en perspectiva. Los autres quarts seràn Huddersfield – Wakefield, Wigan – Castleford e Warrington – Widnes.
 
Dissabte, en Super-Liga, los Sang e Aur recebràn a Brutus los Gigants d’Huddersfield, qu’arribaràn fòrts de las 2 victòrias en seguida sus Leeds. Pronostic favorable als Dracs, mas mèfi!
 
 
Los Cangorós dominan los Kiwis
 
Divendres, se debanava lo tradicional rescontre de prima entre australians e neozelandeses. Los Negres joguèron valents mas sens cap d’inspiracion e los Cangorós ganhèron 16-0 en marcant 3 ensages (Boyd e Inglis dins lo primièr temps; Ferguson sus la còrna de fin de partida) e doas penalitats.
 
A Paramattà, los Papós baton sul fial Fidji: 24-22.
 
Autras resultas: Samoa bat Tonga 18-6. Los juniors australians baton los neozelandeses 34-20, mas las femnas kiwis dominan las australianas 26-16.
 
 
 
 
Alan Roch