Convergéncia Democratica Aranesa (CDA) es a crear un “Nau espaci politic nacionau entà Aran”. Après doas jornadas de reflexion amb una participacion que despassèt las expectativas, ara lo partit aranés a mes en marcha lo sit web www.convergencia-aranesa.org “entà facilitar era participacion dera gent en procès de creacion deth nau espaci politic”.
 
Se demanda als ciutadans lors opinions tocant las relacions amb Convergéncia Democratica de Catalonha (CDC), lo sentiment aranesista de las gents, l’educacion en Aran, la transparéncia en politica, l’environament e se cal cambiar lo nom del partit. O explican ansin:
 
 “Es bases demòstren qu’èm un partit de centre, sociaudemocrata enes drets personaus e collectius, progressista en modèl productiu e liberau e ena defensa deth modèl economic que volem entà Aran. I a unanimitat ena defensa d’un projècte pròpri entà Aran qu’enfortisque es elements nacionaus que mos diferéncien e que mos hèn unics en Euròpa. En definitiva, era gent ditz que prumèr, Aran”.
 
Lo sondatge per Internet es dobèrt fins al 30 de mai. Puèi se presentarà los resultats, tant dels sondatges coma de las prèvias jornadas de reflexion, per marcar “eth camin deth nau espaci politic”.
 
En mai d’aquò, d’autras jornadas de reflexion son previstas fins al mes d’octòbre. Alavetz, dins l’encastre del congrès del partit, se metrà en comun totes los resultats e s’aprovarà los documents estrategics sus la basa d’aquel long procès participatiu.