La tresena edicion del festenal Escambis comença divendres amb vam
Après lo succès de las doas edicions precedentas, lo festenal occitan de Carcin se debanarà del 20 al 22 de mai a Sant Seren e a Sant Joan de la Ginèsta
Un concèrt-balèti de La Talvera clavarà la jornada de dissabte
Un festenal per totes los que se vòlon recampar dins un ambient convivial e festiu
La tresena edicion del Festenal Occitan Escambis se debanarà aquesta dimenjada del 20 al 22 de mai a Sant Seren e Sant Joan de la Ginèsta (Limarga). La particularitat de l’eveniment es de s’adreiçar a un public larg: los que parlan occitan o pas, los que son d’aicí o pas.
Tradicion e modernitat se conjugaràn, un còp de mai, per far descobrir e partejar nòstra cultura e nòstra lenga. Joves e mens joves se retrobaràn dins de domenis tan variats coma la musica, lo cant, la dança, l’artesanat, la literatura, lo teatre o lo conte.
Divendres
La pròva amb aquel programa ric e diversificat que començarà divendres 20 de mai, de 9h30 a 15h30, a l’Ostal dels Joves de Sent Seren, cai Auguste Salesses, per un recampament escolar occitan de la mairala al licèu amb diferentas activitats lo matin (cants, comptinas, danças, teatre...) e un concèrt amb lo grop avaironés Pòm Pogo Dòm l’après-miègjorn.
A miègjorn, un menut occitan serà servit a la cantina del collègi Joan Lurçat.
Lo meteis jorn, a 18h30, aquò serà l’inauguracion de l’Espaci Occitan Carcinòl (luòc dedicat a la lenga e a la cultura occitanas en Òlt), 60 avenguda Pierre e Andrée Delbos, a Sant Seren amb una mòstra sul musèu de Cuzals e un aperitiu dinnatòri.
A 21h, a la sala polivalenta de Sent Seren, avenguda Pierre e Andrée Delbos: lo grope Pòm Pogo Dòm compausat de Paulin Cortial (cant, guitarra, bassa), Joan-Loís Cortial (cant, instruments de tòcas) e Arnaud Cance (cant, percussions) donarà un concèrt per tot public.
Dissabte
Lo lendeman, dissabte 21 de mai, plaça de la Republica a Sant Seren (jos las platanas), la jornada començarà per un mercat artesanal e gromand amb diferents taulièrs dont un en Occitan.
De 10h30 a 12h: Maria-Odila Dumeaux contarà per tot public puèi a 12h30, i aurà un trad aperitiu seguit d’un platèu repais.
A 15h, una conferéncia tot public “De l’occitan al francés” serà animada per Florian Vernet, ancian professor e escrivan.
La jornada del dissabte 21 de mai, s’acabarà a la sala de las fèstas de Sant Joan de la Ginèsta per un aperitiu cantat, a 18h30, amb la corala de l’amicala dels ainats de Soçairac, puèi a 19h per un repais sus reservacion seguit d’un concèrt-balèti amb l’escòla de musica de Sant Seren e lo grop La Talvera.
Dimenge
Lo dimenge 22 de mai, a la sala de las fèstas de Sent Joan de La Ginèsta, i aurà a 12h30 un repais sus reservacion.
A 15h, aquò serà de teatre amb la tropa Expression 176 (Tarn-e-Garona) que jogarà “Lou fiançat de la Hermine” (Lo promés de l'Ermina).
Enfin, a 17h, un recital de musica e de cants populars e religioses amb Pèire Peguin e Daidièr Vergne de l’AMTP Carcin clavarà la tresena edicion del Festenal Occitan Escambis.
Reservacions obligatòrias pels repaisses duscas al dijòus 19 de mai comprés.
L’organizacion es assegurada per l’Associacion Aquí l’Òc qu’a de nombroses partenaris. Per mai d’informacion podètz sonar al +33 (0)6 73 62 64 63 o escriure un e-mail a: aqui.loc@lap....
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Encara un article lausejos ; o puslèu de reclama, escrich per l'organisator del festenal. Es regretos que Jornalet nos parle pas de la Santa Estèla que s'acabèt dimars a Nissa.
Vòli ben aguer d'exemple de festenau occitan que sa particularitat es lo contrari de "s’adreiçar a un public larg: los que parlan occitan o pas, los que son d’aicí o pas". ;)
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Un programa molt complet e atractiu per los que parlan occitan e los que non, e que lo volen coneixer.
Encara un article lausejos ; o puslèu de reclama, escrich per l'organisator del festenal. Es regretos que Jornalet nos parle pas de la Santa Estèla que s'acabèt dimars a Nissa.
Vòli ben aguer d'exemple de festenau occitan que sa particularitat es lo contrari de "s’adreiçar a un public larg: los que parlan occitan o pas, los que son d’aicí o pas". ;)
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari