Dempuèi qualques setmanas es a virar, sus Facebook e d’autres rets socials, un vidèo espantant. Se tracta d’un resumit de tres minutas de çò que se passèt lo 8 d’octòbre de 2011 a l’arena de Rodilhan (Costièra de Nimes). Aquí un quarantentat d’activistas animalistas sautèron sus l’arena en tot protestar pacificament e foguèron brutalament atacats. Los afeccionats de la corrida lor lancèron d’aiga de pression, los peltirèron, lor prenguèron los vestits en los daissant nuds, los trigossèron al sòl, lor escupiguèron dessús e los batèron amb violéncia, çò publica Vilaweb.
 
Lo vidèo es vengut viral e a ja mai de cinc milions de visualizacions.
 

 
En mai d’aquò, es tanben sus internet lo vidèo integral dels faches, de vint minutas:
 


 
En seguida d’aqueles eveniments, los anticorridas denoncièron los agressors e comencèt un procès en justícia de cinc ans que culminèt lo mes passat amb la senténcia contra dètz e uèch individús, condemnats a de penas de preson que van d’un mes a un an, e a de multas fins a mila èuros cadun. Dos dels condemnats se son apelats de la senténcia.
 
Es un dels cases mai grèus de violéncia contra los animalistas d’aquestes darrièrs ans.