Actualitats
L’ÒNU es inquieta per l’agravament dels atacs racistas en Grècia
Un representant de las Nacions Unidas demanda al govèrn grèc de mesuras per arrestar l’aumentacion dels atacs contra d’estrangièrs
Lo Naut Comissariat de las Nacions Unidas pels Refugiats (NACNUR) a exprimit la siá preocupacion per l’agravament dels atacs racistas en Grècia e a demandat al govèrn que prenga las mesuras necessàrias. Laurens Jolles, representant del sud-èst d’Euròpa de l’agéncia de l’ÒNU, parlèt dijòus passat de l’agravament dels atacs racistas contra los estrangièrs —compreses los demandaires d’asil e los refugiats— amb lo ministre grèc de la Proteccion del Ciutadan, Nikos Dendias.
Segon Jolles, lo fenomèn “a aquerit de dimensions inquietantas e sembla qu’es coordenat per de grops e d’individús que se justifican en disent qu’agisson en nom de la seguretat publica, mas en realitat menaçan las institucions democraticas”. Dins aquel sens, lo representant de l’ÒNU a demandat al ministre qu’adòpte de mesuras per luchar contra l’aumentacion dels atacs racistas, per protegir las victimas e per perseguir los autors e los instigators de la violéncia.
L’intrada dins lo parlament del partit neonazi Chrysi Avgi (“alba daurada”), amb 7% dels vòtes, es anada en parallèl amb la multiplicacion dels atacs racistas dins lo país. Lo Conselh d’Euròpa condemnèt recentament la violéncia xenofòba e l’impunitat dels autors dels atacs. Es de supausar qu’aquela violéncia es protagonizada, o instigada, per aquel partit.
Parallèlament, d’organizacions coma Amnesty International e Human Rights Watch an denonciat aqueste agost “la repression massissa e illegala” de la polícia grèga contra de personas sens papièrs, per las arrestar o las expulsar del país.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
"Dison qu'agisson en nom de la seguretat publica, mas en realitat menaçan las institucions democraticas". Laurens Jolles deuriá dobrir los uèlhs : en Euròpa del Pacte d'Estabilitat Financiària e del tractat constitucional de Lisbõa, las democracias son ja mòrtas e sebelidas. Téner una orientacion clarament esquerrista, sociala e favorabla al mai grand nombre es vengut anticonstitucional. Lo pòble-classa pòt plan anar votar. Se trufan d'ara enlà ben pro de las resultas de votacions. La politica serà de dreita dura o durament de dreita. Alavètz, tota aquela racalha extremista que se passeja per carrièras, semenant violéncia e terror, s'i caldrà plan acostumar, totes, ja qu'es pas res mai que lo simptòm d'una malautiá que se ditz "neoliberalisme". Ne volètz pas mai ? Alavètz vos va caler agantar las armas per tornar establir unas vertadièras basas democraticas (non pas utopicas, mas plan concretament comas las que nos donèron lo Conselh Nacional de la Resisténcia, e que son, a mand de sacamandar totas). Despertatz, sénher Jolles ! Volètz salvar la democracia, en Grècia o endacòm mai ? Embarratz lèu lèu, los caps d'establiments bancaris internacionals, tecnocrats europèus e membres de totes los grops de pression financiaristas e neoliberals que gangrènan furiosament e desastrosament totas las orientacions europèas actualas, ni lo mesprè mai estricte dels pòbles e de sas volontats d'ara enlà cap e tot segondàrias.. Se que non,…
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari