Dins l’encastre de las manifestacions que se debanan per tot l’estat francés contra la reforma del còde del trabalh, la nomenada Lei El-Khomri, Libertat ven de publicar qualques fòtos de las mobilizacions que se tenguèron ièr a l’entorn de l’usina petriquimica de Lac (Bearn), e la manifestacion qu'aguèt luòc puèi a Pau.
 
Los representants de qualques movements sindicals e socials bloquèron lo giratòri a l’intrada d’Artics. “La colèra monta, se’n vam entà quauquarren hèra dur. Tot qu’ei organizat entà descredibilizar l’accion deus salariats, de la joenessa. Lo govèrn a hèit passar en fòrça aquera lei arrefusada peu 70% deus francés”, çò declarava a Sud Ouest Timothée Esprit, delegat sindical de la CGT.
 
Aprovada sens lo vòte del Parlament amb l’estratagèma del 49.3
 
La polemica reforma del trabalh s’aprovèt l’11 de mai passat sens lo vòte del Parlament, gràcias a l’estratagèma de l’article 49.3 de la Constitucion. Una reünion extraordinària del conselh dels ministres aviá autorizat la velha lo primièr ministre francés Manuel Valls a recórrer al 49.3. Aquel article permet al govèrn d’engatjar sa responsabilitat sus un projècte de lei. Se cap de mocion de censura es pas votada, lo tèxt es adoptat sens cap de formalitat.
 
Aquel estratagèma foguèt ja emplegat pel govèrn Valls per aprovar la Lei de liberalizacion economica, coneguda coma Lei Macron.
 
 

 
 
La reforma del còde del trabalh
 
Dins la linha de çò que marca la tròica, aquela reforma ditz voler “protegir los salariats, favorir l’emplec e donar mai de marge de manòbra a la negociacion en entrepresa”. Dins la practica, manten la setmana de 35 oras, mas facilita los licenciaments, permet d’esperlongar la durada de la jornada de trabalh sens besonh d'acòrdi amb los trabalhadors, e permet de far demenir la remuneracion de las oras suplementàrias.
 
Los sindicats refusan quitament la nòva version que lo primièr ministre Manuel Valls presentèt lo 14 de març passat, en seguida de fòrça protèstas e d'una autra jornada de cauma generala que mobilizèt mai de 250 000 personas segon los principals mèdias. Aquela rescritura a pas convencut los sindicats: la CGT e l’UNÈF mantenon lor oposicion. En mai d’aquò, lo patronat, representat pel MEDÈF, qu’èra en favor del nòu projècte de lei, ara se ditz decebut.
 
Valls presentèt una version “corregida” de sa proposicion de lei, coneguda coma “Lei Trabalh” o “Lei El Khomri”, amb qualques cambiaments. Lo mai remarcable seriá que lo barèm que deu limitar las indemnitats per licenciament serà solament “indicatiu”.