La jove nigeriana que foguèt localizada dimars après passar mai de dos ans sequestrada pel grop jihadista Boko Haram rescontrèt dijòus passat lo president del país, Muhamadu Buhari, que pendent los darrièrs meses a promés de localizar los centenats de filhas raubadas dins una escòla de Chibok.
 
Amina Ali Darsha Nkeki foguèt menada inicialament fins a la vila de Maiduguri, capitala de l’estat de Bòrno. Acompanhada de sa maire, Binta, e d’autoritats coma lo ministre de la defensa, ela anèt al burèu de Buhari dins la capitala del país african, Abuja.
 
La joventa, qu’a l’ora d’ara seriá màger d’edat, fasiá partida del grop de las 200 filhas que foguèron raubadas a Chibok a partir d’abril de 2014. De susvelhants civils la localizèron dimars passat près de Damboa, al costat d’un enfant e d’un “terrorista sospechat de Boko Haram” —segon l’armada— que se presentèt coma lo marit d’Amina.
 
Lo grop de pression creat per promòure la recèrca de las filhas, nomenat Bring Back Our Girls (Entornatz Nòstras Filhas), a assegurat que las dròllas ostatges que son encara en mans de Boko Haram se tròban al Bòsc de Sambisa, un bastion del grop islamista. Aquela afirmacion met mai de pression sus Buhari.
 
Mai de 15 000 personas son mòrtas e mai de dos milions de personas an quitat lors ostals a causa de la violéncia de Boko Haram en Nigèria, Chad, Nigèr e Cameron. Lo president nigerian a promés de combatre l’insurgéncia, conscient que se critiquèt fòrça lo sieu predecessor, Goodluck Jonathan, perque ne faguèt pas pro.
 
 
 
 

---

De legir: Cécile Hautefeuille: Quau son los Boko Haram