La jurada de l’afar del masèl d’Utøya e de l’atemptat d’Òslo, comeses per Anders Behring Breivik fa un pauc mai d’un an, a condemnat aquel d’aquí a la pena maximala, 21 ans de preson, amb la possibilitat de los prorogar. La jurada l’acusa a l’unanimitat d’“actes de terrorisme” e l’a declarat, de mai, en bon estat de santat mentala. Aital, doncas, complirà pas la pena dins un espital psiquiatric, mas dins una preson.

Breivik faguèt esclatar una veitura bomba al centre d’Òslo, çò que tuèt uèch personas e ne feriguèt mai de dos cents. Anèt après a l’illa d’Utøya, ont los joves del Partit Trabalhista Norvegian fasián un acamp e, abilhat coma un policièr, n’assassinèt 69 en los fusilhar.
 
Los atemptats, los piègers de Norvègia dempuèi la Segonda Guèrra Mondiala, esmoguèron lo país.
 
Breivik, qu’a 32 ans, es un ancian militant del Partit del Progrès (FRP), d’extrèma drecha. Considerava que los joves que participavan al campament d’estiu en l’illa d’Utøya èran “de traïdors en favor de l’immigracion”.
 
Dins lo jutjament que s’es debanat aquestes darrièrs meses, aviá confessat èsser l’autor d’aquel masèl; diguèt que planhiá d’“èsser pas anat mai luènh” e qu’agiguèt “perque fasiá besonh”. Breivik reconeguèt pas l’autoritat del tribunal que l’aviá jutjat.
 
 
Un rapòrt independent ditz que la polícia o poiriá aver tot evitat
 
La comission de recèrca sus los atacs d’Òslo, fa qualques setmanas, critiquèt durament lo ròtle de la polícia dins un rapòrt. En concret, se considèra que l’atemptat al centre vila se seriá pogut evitar e qu’Anders Breivik l’aurián pogut arrestar abans. “L’atac contra lo quartièr ministerial del 22 de julhet se seriá pogut evitar mercés a l’aplicacion eficaça de las mesuras de seguretat existentas”, çò conclutz la comission dins lo rapòrt mandat al primièr ministre norvegian, Jens Stoltenberg, qu’a admés la tardança.
 
Lo rapòrt critica tanben que la polícia arribèt a l’illa d’Utøya 70 minutas après recebre lo primièr avís.
 
Cinc jorns après los tristes faches, los partits norvegians s’acordèron per crear una comission d’avaloracion independenta, nomenada Comission del 22 de Julhet, qu’a publicat lo primièr rapòrt en parallèl amb lo procès contra Breivik.