Tres orsalhons son nascuts a Aran Park, un pargue de visualizacion de la fauna de 16 ectaras plaçat al pòrt de Portilhon, a Bossòst (Val d’Aran). Los petits son filhs de Luna e de Ben, los orses que vivon en captivitat dins aquel pargue. Nasquèron lo 23 de genièr passat, mas los responsables del sit an esperat fins ara per comunicar la nòva, per evitar que l’excès de vesitas inquiete la maire e qu'aquesta refuse los pichons. La naissença dels tres orsalhons foguèt quitament un estonament pel personal que ten en carga los plantigrads, qu’entendèron las baselanadas dels animals dins la tuta ont l’orsa maire ivernava. Sabián pas qu’ela èra prens.
 
Ara la maire a sonhat e alimentat los tres petits, que sortiguèron de la tuta pel primièr còp dimècres passat e comencèron d’explorar l’encencha.
 
S’agís de doas femèlas e d'un mascle, e viuràn en Aran durant un an. Puèi seràn menats dins un autre endrech, pr’amor que la naissença “non ei cap estada cercada ni evitada”, çò ditz un comunicat de l’Aran Park. “Actuauments i a un excès d’orsi en captivitat”.
 
Divendres passat recebèron la primièra vesita dels veterinaris que lor placèron lo chip identificatiu e verifiquèron se se trobavan en bona santat.