Es qu’i a una garena, una pauma godofla que se passa, daus ríder d’un chic pertot, chancaires que rasan las balancas de lur berret… Tota Gasconha duhòra, a grands còps de gentilhessa  e d’altruisme, los organizaires installan los expausants, acuelhan los vesitaires, orientan, coordonan… Lo magret es còit coma fau, las cançons paradas a espelir saus balòts, la bierra color d’aur e lo cèu luminós maugrat una delegacion de crums.
 
Aquò ’ra lo 13 de junh de 2015, a l’Estadi Andriu Negre, shèite de l’Associacion Esportiva e Culturau Peçac-Lauseta, club pas coma los autes que viu e prospèra sau sable e devath los pins d’aquera partida landescòta de la comuna de Peçac,  au siroèt de la metropòli bordelesa.
 
Julian, Vincenç, Nicolau mei quauques autes son lavetz jogaires de la seccion rugbi daus “jaunes e negres”. Dens aqueste triangle gascon (Punta de Grava, BAB, Aran) dau quau son originaris, drom una lenga-cultura millenària. Devath sa forma mei occidentau, l’occitan —aperat gascon en Gasconha— es vengut ende eths coma una evidéncia. Dab l’evolucion de las mentalitats e l’inspiracion d’autes modèls de ciutadanatge permetent l’integracion totala de las lengas-culturas dens la pluralitat republicana, las joenas generacions d’aquera contrada, entretant a Bordèu e son virat, prenen consciéncia que son los portanèirs d’un richèir inestimable, n’an pas mei l’intencion de calar doç.
 
Aqueth jorn, mesteiraus, recardèirs, associatius, baraclaires e professionaus de mantuns mestèirs s’avèvan donat rendetz-vos devath los casses dau quartèir de la Lauseta. Chancaires, elevaires de cans aulhèirs, contaires… Per coronar lo tot, dus evenements federators èran prepausats: una corsa de chancaires permetent a tot cadun de s’iniciar ad aquesta practica emblematica de la Lana de Gasconha (tanben a l’entorn de Bordèu) divuda aus sòus brauishuts dau lòc, apuei una granda corruda landesa de mòstra, organizada per la Ganaderia D’Argelòs de Sent Sever-Cap de Gasconha, dens de las arenas apitadas per l’ocasion dens lo quite barralh de l’estadi!
 
Lo succès fut inesperat. Los organizaires i avèvan credut, contra malina e punhent. Avèvan sabut transméter sa fe aus dirigents dau club. Shens subvencions ni ajudas, o quasi, avèvan de sas mans façonat un pur moment d’amistat, de jòia e de paratge. Èrem si talament urós aqueth jorn.
 
E ben coma estar urós nos agrada, l’Escapada s’i torna ongan! Rendetz-vos dissabte 18 de febrèir, medís lòc, medissa òra! Devath los casses d’Andriu Negre, seràn aquí, dab los benevòls, los amics, los que vòlen viure lur lenga-cultura dens la vita, la veraia, lònh daus grands paraulís antropologics. Clacarà e petrilharà Gasconha dens las bocas, dens las cançons (una excepcionau cubada de cants occitans dau virat de Bordèu es prevista): los contaires seràn au rendetz-vos, dont l’endarrigadissa Elieta Dupouy de Belin-Beliet, la darrèira contaira tradicionala de Bordalés! Petrilhanta de ginh, aquera mainada de ueitanta tres ans nos aportarà non pas dau patrimòni mòrt, mès dau lengatge, de las cançons, daus mots ben vius e ben rebombissents, a façon daus griòts africans que contunhan de har passar la cultura millenària mès jamès vielha, que se miralha dens los uelhs daus enfants sheitats sus l’èrba doça tot a l’entorn. La corruda landesa de regde bona qualitat, la musica, tot sarà aquí jurat!
 
Per tots las e los que passarén capvath lo virat de Bordèu a l’entorn dau 18 de junh, aquesta crida (falèva plan que la hasussi, aquera aquí) s’adreça a vosauts tots, d’on que siguetz, quau que siga vòsta tralha cap a las lengas e culturas minoritàrias, quitament s’atz totjorn credut que Gasconha èra sau bòrn de l’èrm de Kalahari e la garbura una còiha tradicionala tibetana, aquela jornada es vòsta tanben.
 
N’avem arren a vos ofrir que sinceritat, recèrca de çò que som e volem éster, nosauts que vivem sus aquesta tèrra, quauquas gotas de bierra, quauques rais de sorelh e bèthcòp de sorríders. Mès aquò seré domatge de vos en privar.
 
Dissabte 18 de junh de 2016, Estadi Andriu Negre, Peçac (quartèir Lauseta França [Alouette-France]): Escapada Gascona!
 
Vos esperam a brulhs!
 
 
 
 
Dàvid Escarpit