Las Arcadas en fuòc
 
Fasiá dins los 30 °C a Albi aqueste dissabte de vèspre, mas la finala se deviá jogar a 3 oras pels besonhs d’una television (France 3) que la retransmetèt pas sus sos ecrans!
 
En dobertura, los juniors de Sant Estève-XIII Catalan dominèron Avinhon: 42-20.
 
Los sostens carcassoneses e limosencs èran per parts egalas dins las tribunas de l’Estadium. Tre la segonda minuta, Anderson mandava Gressèque al pè dels pals: 6-0 pels canaris. Lo tresena linha limosenc Roch replicava tre la 7a minuta. A la 12a, Towers recuperava una palma tombada e filava long de la tòca marcar l’ensag. Mas Limós preniá l’avantage 12-10 aprèp un ensag de Mayans transformat per Murcià. Towers marcava tornar en cap de linha aprèp una ataca bèla de Carcassona. Puso embarcava la defensa carcassonesa per tornar metre Limós davant, 16-14. Lo primièr temps s’acabava amb un ensag en fòrça de Samson que Gressèque transformava: 20-16 per l’AE Carcassona.
 
Mas dins lo segond temps, los Canaris se mostrèron mens vius e mens inspirats que Limós. Se contentavan d’ensacar doas penalitats. En fàcia, lo centre australian Mataele fasiá la diferéncia mercé a dos ensages (un transformat per Murcià). 26-24 per Limós a dètz minutas de la fin e Carcassona trapariá pas las fòrças d’inversar un còp de mai la marca. 48 ans apuèi e encara un còp contra Carcassona, Limós podiá solevar lo bloquièr Max-Rousié. “Soi lo capitani lo mai aürós de la planeta tretzista”, afirmèt Miquèl Murcià. Lo camin pareguèt plan cort fins a la Plaça de la Republica ont Carnaval coneguèt una novèla nuèit improvisada per festejar los Reis novèls.
 
 
Mal sòrt catalan a la Dimenjada Magica
 
En Superliga, se teniá la Dimenjada Magica amb son fais de suspresas. Dissabte, Salford confirmèt que Widnes es en posicion pausa 18-12; los Tigres de Castleford sortiguèron las arpas per dominar lo cap de fila Warrington 34-14; Wigan constatèt que lo Rinocèros (Leeds) èra plan aflaquit: 40-8.
 
Dimenge, una victòria podiá permetre als Dracs de prene la primièra plaça al classament. Contra Wakefield, menèron lèu fait 14-0 e aquí se metèron a desjogar. A dètz minutas de la fin, la marca èra de 24-24. Richards, qu’aviá ja mancat tres transformacions sus cinc, mandèt una penalitat sul pal e lo dobertura anglés faguèt la decision sus un tombat: 25-24! Los Gigants marquèron lor retorn en forma en asfixiant Saint Helens: 48-20. Hull FC, en ganhant 28-16 un dèrbi nharrut contra Hull KR, s’empara de la primièra plaça del classament. Mai de 70 000 espectators an seguit las partidas de la Dimenjada Magica e se parla de l’Estadi Olimpic de Londres per recebre l’edicion 2017.
 
Dissabte, los Dracs recebràn Hull KR e ensajaràn de faire oblidar los punts perduts aqueste dimenge.
 
En League One, Tolosa contunha d’ensacar las victòrias: 44-16 a Barrow abans de recebre Gloucester dissabte de vèspre a Blanhac.
 
 
Lo tombat novèl de Thurston
 
En NRL, los Vaquièrs ganhan un còp de mai contra Brisbane: 19-18 mercé a un tombat de Thurston a 5 minutas del tèrme. Las doas formacions son a dos punts dels primièrs: las Làmias de Cronulla qu’an batut Manl, 20-12.
 
 
Un dimenge XIII
 
Aqueste dimenge 29 de mai, Frontinhan aculhirà las finalas del XIII feminin amb un rescontre Factura-Tolosa Ovalia en Elèit 1 e Carcassona-XIII Provençal en Elèit 2.
 
A Carcassona (Estadi Mazet), se jogaràn las finalas de Nacionala 1-B (Vilanòva de Menerbés contra Sauvatèrra de Comenge) e de Nacionala 1-A entre Ferrals de las Corbièras e los provençals d’Entraigas. Ferrals a ja fait part de son intencion d’integrar l’Elèit 2 la sason venenta.
 
En Nacionala 2, finala Pujòls-SalsAs dimenge a Albi. Dimenge tanben, a Avinhon, finalas dels campionats minims Lesinhan. Catalans e cabdèths Tolosa-Catalans. I aurà de lagremas de jòia e de tristesa aquesta dimenjada!!!
 
 
Beure dins la Copa
 
Ganhar un bloquièr de campion es plan, mas la croniqueta occitana del numèro de mai de XIII Magazine soslinha la superioritat de las Copas suls planchòts:
 
“Beurem dins la Copa! Una Copa es totun quicòm mai qu’un bloquièr! Sustot per festejar la victòria e beure un còp amassa amb los collègas!
 
Es un vertadièr viatge enologic que permeton las victòrias un còp l’una, un còp l’autra de las formacions tretzistas e tanben per se sovenir e tornar inventar lo rugbi-champanha dels aujòls.
 
Bon, degun pensèt pas de verificar se Lord Derby beviá son tè a cinc oras del vèspre dins la Copa o se l’emplenava de cervesa o de whisky! Es pas aicí nòstre prepaus. Vesèm puslèu la Copa s’emplenar de Cabardés o Malapèira per una victòria dels Canaris; las bofiòlas de Blanqueta esclatar en confètis contra lo bòrd del recipient del costat de Limós; un Corbièras a faire marinar un singlar per Lesinhan; una negreta de Fronton per portar lo dòl dels adversaris de Tolosa; la benediccion del Papa de Castèunòu aprèp una victòria d’Avinhon; un còp de Galhac luènh de l’uèlh prèp del còr per Albi; a Vilanuèva, val mai pas abusar del vin de Buset; a Vilafranca, lo Marcilhac daissa un gost amar als adversaris; lo Puòg Sant Lop saludarà una victòria de Montpelhièr; los Dracs preparan una mescla mitat Banyuls-mitat Ribesaltes. En esperant de vins de Bordèu (mèfi a la factura!), un Juranson per Pau, unas Costièras de Provença per Marselha, lo Condrieu per Lion...
 
E Palau del Vidre fornirà lo veire per las cantinas e damajoanas!!!!”
 
 
 
 
Alan Roch