La lista de las personas mòrtas que volián pojar Chomolangma (lo Mont Everest) a despassat ongan las 250 dempuèi la primièra conquista documentada d’aquela montanha en 1953. Sembla qu’aquel somalh, al delà d’èsser lo pus naut de la Tèrra, es tanplan un assassin que tua sas victimas de manièras plan desparièras.
 
La granda majoritat dels alpinias mòrts a Chomolangma perisson a causa de l’aire d’amont. Aquò es çò qu’es arribat a tres alpinistas fa pauc, que son mòrts fa qualques jorns en tot davalar la cima de la montanha. Èran un olandés, una australiana e una indiana. La causa dirècta de la mòrt seriá la malautiá de la nautor.
 
L’expedicion èra ja la cinquena que fasiá Eric Arnold, un olandés de Rotterdam, e la setmana passada poguèron arribar finalament a la cima de la montanha mai nauta del Mond après o aver ensajat quatre còps. Mas pendent lo retorn, e un còp arribats al camp IV, Arnold moriguèt per congelacion e per mal de nautor. Un jorn puèi, tanben morissián Maria Strydom, australiana, e Subhash Paul, d’Índia.
 
 
Una davalada dangierosa
 
La granda majoritat de las mòrts que patisson los alpinistas que vòlon coronar Chomolangma a coma causa dirècta la davalada e non pas la pojada. Aquò s’es debanat pr’amor que las pressions son, de còps, mens bassas e que i a mens d’oxigèn e mai de freg, sustot pendent l’airal de la mòrt, al dessús dels 7000 mètres. Alavetz los alpinistas an d’edèmas cerebrals que son fatals.
 
En mai d’aquò, en 2014 una avalanca provoquèt la mòrt de 16 nepaleses e pendent los tèrratrems de 2015 fins a 18 alpinistas i moriguèron. Es per aquela rason que foguèron enebidas mai d’expedicions fins en 2016. Totun, aquesta expedicion internacionala aviá començat après aver practicat ben e totes los sieus membres èran d’alpinistas reconeguts. Ara la còla expedicionària a coma problèma principal la rintrada dels cadavres.
 
 
 
 
Christian Andreu