La polícia desgatgèt aqueste dimars a l’aubada los qualques centenats de manifestants del sindicat CGT qu’ocupavan la rafinariá Esso e lo depaus de carburants de Fòs de Mar (Crau), en oposicion a la reforma del còde del trabalh, la nomenada Lei El-Khomri. Segon la quita prefectura de polícia, las fòrças de l’òrdre trobèron “una resisténcia importanta”. Los manifestants s’embarrèron dins lo sit diluns passat e lo bloquèron en empedissent lo pas de veïculs e de camions. “Volèm la retirada de la lei del trabalh”, çò aviá declarat diluns Maxime Picard, lo secretari general de la CGT del departament de Bocas de Ròse, segon Libération.
 
 
“Gaireben de scènas de guèrra”
 
Los gases lacrimogèns lançats par la polícia provoquèron la respòsta dels manifestants que —totjorn segon la prefectura— respondèron en lançant “de nombroses projectils”. Lo bilanç de l’operacion es de quatre manifestants arrestats e sèt policièrs ferits. Oficialament an pas raportat lo nombre de manifestants ferits, mas la CGT assegura que n'i a plusors. Lo sindicat a plangut la brutalitat de las fòrças de l’òrdre francesas e a dich que s’es viscut “gaireben de scènas de guèrra”.
 
De son costat, la ministra del trabalh francesa Myriam El-Khomri, que se desplacèt diluns a Marselha, deplorèt que “de salariats, de franceses foguèsson preses en ostatge”, del temps que sièis rafinariás de l’estat francés (sus uèch) son afectadas per de movements de protèsta contra son projècte de lei.
 
 
Blocatge de sits petrolièrs per tot l’estat francés
 
D'efièch, lo blocatge dels sits petrolièrs se manifèsta per tot l’estat francés. Sièis sits sus uèch an viscut de blocatges de protèsta, del temps que lo govèrn francés a promés de los “liberar”.
 
Aqueles blocatges provòcan dempuèi qualques jorns de dificultats d’aprovisionament de benzina dins fòrça estacions de servici.
 
 
Aprovada sens lo vòte del Parlament amb l’estratagèma del 49.3
 
La polemica reforma del trabalh s’aprovèt l’11 de mai passat sens lo vòte del Parlament, gràcias a l’estratagèma de l’article 49.3 de la Constitucion. Una reünion extraordinària del conselh dels ministres aviá autorizat la velha lo primièr ministre francés Manuel Valls a recórrer al 49.3. Aquel article permet al govèrn d’engatjar sa responsabilitat sus un projècte de lei. Se cap de mocion de censura es pas votada, lo tèxt es adoptat sens cap de formalitat.
 
Aquel estratagèma foguèt ja emplegat pel govèrn Valls per aprovar la Lei de liberalizacion economica, coneguda coma Lei Macron.
 
 
La reforma del còde del trabalh
 
Dins la linha de çò que marca la tròica, aquela reforma ditz voler “protegir los salariats, favorir l’emplec e donar mai de marge de manòbra a la negociacion en entrepresa”. Dins la practica, manten la setmana de 35 oras, mas facilita los licenciaments, permet d’esperlongar la durada de la jornada de trabalh sens besonh d'acòrdi amb los trabalhadors, e permet de far demenir la remuneracion de las oras suplementàrias.
 
Los sindicats refusan quitament la nòva version que lo primièr ministre Manuel Valls presentèt lo 14 de març passat, en seguida de fòrça protèstas e d'una autra jornada de cauma generala que mobilizèt mai de 250 000 personas segon los principals mèdias. Aquela rescritura a pas convencut los sindicats: la CGT e l’UNÈF mantenon lor oposicion. En mai d’aquò, lo patronat, representat pel MEDÈF, qu’èra en favor del nòu projècte de lei, ara se ditz decebut.
 
Valls presentèt una version “corregida” de sa proposicion de lei, coneguda coma “Lei Trabalh” o “Lei El Khomri”, amb qualques cambiaments. Lo mai remarcable seriá que lo barèm que deu limitar las indemnitats per licenciament serà solament “indicatiu”.