S’estend per tot l’estat francés lo blocatge de rafinariás de petròli, e se multiplican las estacions de servici qu’an de problèmas de provesiment del carburant. Segon çò que rapòrta Le Figaro, de particulars son a vendre lors resèrvas de benzina a prètz d’aur, los automobilistas de tota la Republica prenon de precaucions e las societats petrolièras an de pèrdas d’entre 40 e 45 milions d’èuros per setmana.
 
Aqueles blocatges son la seguida de las protèstas que se debanan dempuèi qualques meses contra la reforma del còde del trabalh, una mesura del govèrn de Manuel Valls fòrça impopulara e contestada, que ven d’èsser impausada al marge del Parlament amb l’estratagèma de l’article 49.3 de la Constitucion. La responsa del govèrn francés es de se mostrar “determinat per que i aja pas cap de penúria en França”, en afirmant quitament que los sits petrolièrs blocats seràn “liberats”. Aital se “liberèt” diluns passat lo sit de Fòs de Mar (Crau), una “liberacion” ont se vegèt “gaireben de scènas de guèrra”.
 
 
Mapa de las estacions de servici secas
 
Le Figaro ofrís una infografia que rapòrta en temps real qualas son las estacions de servici qu’an pas pus de benzina. La mapa es espantanta.