Actualitats
Aquesta setmana baissaràn los prèses dels carburants dins l’Estat francés
Çò diguèt dissabte lo ministre de l’economia, Pierre Moscovici, a l’Universitat d’Estiu del PS
Lo ministre de l’economia Pierre Moscovici afirmèt dissabte, a La Rochèla (Aunís, Aguiaina), que los prèses dels carburants davalaràn aquesta setmana qu’i intram. “O disi aicí, los prèses dels carburants davalaràn per un esfòrç partejat. M’i engatgi”, çò diguèt lo ministre dins l’encastre de l’Universitat d’Estiu del Partit Socialista.
Del sieu costat, lo president de l’Union Francesa de las Indústrias Petrolièras (UFIP), Jean-Louis Schilansky, declarèt ièr a l’AFP qu’èra “prèst a acompanhar l’esfòrç del govèrn”.
Interrogat per l’AFP, lo ministre Moscovici diguèt que “i aurà de decisions que seràn presas, qua marcaràn la volontat del govèrn que lo prètz del carburant siá mai flac que uèi, inferior. I aurà, espèri, un esfòrç partejat. Nos volèm convéncer. E desiri qu’aquela decision siá aplicabla, fòrça rapidament, immediatament”.
Fa qualques setmanas que los prèses del gasòli e de la benzina son arribats a de nivèls recòrd.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Aquò son de mesuretas d'especièr (aquò dich sens mespresar aquel mestièr: cadun son pretzfach). Se tòca pas lo problèma de fons de l'espaci e los desplaçaments. L'essença mens cara es la que se consoma pas. A l'ostal avèm pas qu'una veitura, pichona. I a d'autobuses e d'autocarris per anar al trabalh. A mai nos sèm petaçats per pas l'aver luènh. E per la vida vidanta fasèm tot pedibus, de las crompas a la santat en passant per los lésers. Avèm fach de causidas: pas perdre lo temps -e las dardenas- en desplaçaments. Disi pas qu'es plan aisit de far aital per totòm mas segur que se'n trapan que o poirián far mas que i an pas ben soscat. E puèi es als politics de crear d'autras condicions de vida, de soscar a una autra ciutat, a un autre campèstre. Sustot que, de tot biais, lo prètz del petròli pòt pas far mai que pojar.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari