Lo 30 de novembre passat, dotze sus dètz e uèch postièrs destinats al burèu de la Pòsta de Ribesaltes (Catalonha Nòrd) anonciavan lo començament d'una cauma per denonciar de retalhadas. Una cauma dins l’encastre d’una dinamica de mobilizacion que, dins las darrièras annadas, denóncia lo desmantelament del servici public de la Pòsta que se realiza progressivament e agís pontualament contra cadun dels centres de distribucion situats dins de vilatges de l'entorn de Perpinhan, e tanben de la quita vila. Aital la Pòsta cèrca de barrar los pichons ponches de distribucion e de regropar los servicis en de grands centres de distribucion alonhats dels vilatges. En parallèl, las condicions de trabalh dels salariats son de mai en mai precàrias.
 
Pendent las darrièras vint annadas, la Pòsta a liquidat aperaquí 80 000 emplecs, en aplicant de reestructuracions que se son acceleradas fa gaire e qu'an menat a minimizar la concepcion de servici public e a la remplaçar per un objectiu gaireben exclusiu: la productivitat. Periodicament, dins totes los centres de distribucion, i a de supressions de pòstes e, en consequéncia, de cargas suplementàrias de trabalh per los postièrs, que cada còp veson lors tascas mai diversificadas e devon far los comercials, los vendeires, los tecnicians...
 
En mai d’aquò, lo comitat de la cauma denóncia que cèrtas tornadas, a Perpinhan, son quitament de 100 quilomètres per jorn e qu'aquestes ans a aumentat lo corrièr de distribuir per cada postièr.
 
Pendent los darrièrs meses i a agut de convocacions a la cauma dins los burèus de Sant Llorenç de la Salanca e de Cabestany, que son estadas fòrça cortas puèi que s'es pachat d’acòrdis amb la direccion de l'entrepresa. A Paretstortes, vilatge afectat pels barraments del sector de Ribesaltes, la mobilizacion per defendre aquel servici public a menat a un referendum local. Amb una participacion del 35%, la populacion votèt amb lo 99% dels vòts, en favor de manténer un centre de pòsta dins lo vilatge e contra la centralizacion.
 
Dins lo cas de Ribesaltes, los caumaires representan dos tèrces del personal. Sus un efectiu total de dètz e uèch salariats, dotze son en cauma, mas lo comitat de la cauma remarca que los cinc restants an de contractes precaris que dificultan lor drech de cauma. An lo sosten dels sindicats SUD e CGT e mai se —çò ditz Joan-Miquel Sol (SUD)— lor accion se realiza dins un collectiu unitari.
 
Dempuèi la primièra minuta de mobilizacion an ensajat d’èsser en ret amb d’autres obrièrs en lucha e, coma dins lo cas de Tuïr, an trobat la solidaritat dels abitants d'aquel vilatge de la plana de Rosselhon, que manten un malhum comercial e associatiu plan important. Aquel sosten, apondut al sosten economic e sindical dins l’encastre estatal, a permés de far durar aquela cauma quasi sièis meses, en venent la cauma mai longa de l'istòria de la Pòsta.
 
Fa tres setmanas, amb la volontat de difondre la lucha a mai de mond, los caumaires decidiguèron d'installar un campament permanent, nuèch e jorn, al centre del vilatge per se dobrir a la populacion e sustot, per generar un espaci de convergéncia de las luchas amb d’autres sectors socials. Mentretant, de caumaires de las Finanças Publicas, de l’EDF (Electricitat de França), de salariats del camin de fèrre e una multitud d'organizacions socialas e sindicalas de Catalonha Nòrd se son retrobats dins aquel meteis espaci. Aquela volontat de bastir un ret e de se ligar al ja naissent movement contra la Lei El-Khomri los portèt a apelar lo campament Facteurs Debout (Factors de Pè).
 
En parallèl, las revendicacions que las defendián davant la Pòsta son assumidas per la direccion, e mai se la cauma a contunhat pr’amor que non solament an pas obtengut l'ensems de las reclamacions mas tanben un membre del comitat de la cauma es estat condemnat per un conselh de la disciplina que lo poiriá menar a una suspension d’emplec sens tractament de 24 meses. Los  caumaires denóncian aquela practica de l'entrepresa. "S'es capitat qu'un camarada a perdut lo salari e l'escotisson correspondent a la retirada, pr’amor que lo revoquèron coma mesura de puniment per una simpla presa de la paraula", çò explica Agustín, membre del comitat.
 
Coma mesura de pression per arrestar çò que denóncian coma un secutament de la direccion e un cas clar de repression sindicala, dimars un dels membres del collectiu comencèt una cauma de la fam amb la tòca d'apondre a las revendicacions del trabalh mancantas un acòrdi per evitar las mesuras de puniment envèrs los salariats en cauma e denonciar "lo mesprètz, la provocacion e l'intimidacion d’una partida de la direccion", çò diguèt lo caumaire de la fam, que reclama, ara mai que jamai, tot lo sosten possible per mediatizar l’afar e poder aital quichar la direccion.
 
Dimècres passat, la darrièra taula de negociacion s'acabèt sens acòrdi. Es probable que i aurà pas cap de pas de la direccion abans lo conselh de disciplina que lo caumaire acusat s'i deu sometre lo dimars que ven, 31 de mai. Comptarà amb la solidaritat organizada d'autres companhs, qu'arribaràn amb divèrses autobuses fins a Montpelhièr. La cauma contunha e la cauma de fam tanben, dins un contèxt de mobilizacion creissenta per tot l’estat.
 
 
 
Pablo Bonat
Article adaptat del jornal catalan Directa