Lo camp de refugiats d’Eidomeni es ja completament evacuat, segon çò que raportavan las autoritats grègas dijòus passat. E mai s’èra previst que l’operacion durèsse dètz jorns, lo sit foguèt evacuat en tres jorns. Lo deslotjament lo comencèt far la polícia grèga la setmana passada. La mitat dels refugiats que i vivián en de condicions precàrias son menats dins de camps oficials. Segon lo pòrtavotz del govèrn Giorgos Kyritsis, “sèt camps son de bastissas industrialas e dos son d’espacis dobèrts amb de tendas”. En mai d’aquò Krytsis assegurava que las installacions, e mai s’èran rudimentàrias, avián d’electricitat, d’aiga correnta, de telefòns, de dochas e de comuns.
 
L’autra mitat dels mai 8500 refugiats, que se n’anèron per lor compte, son anats dins d’autres centres d’aculhida e tanben se son establits dins d’ostalariás de la region. Qualques unes d’aqueles centres d’aculhida son de tendas installadas dins d’estacions de servici. Eles aurián pas volgut pojar dins los autocars per malfisança, car las autoritats lor aurián pas explicat ont los menavan precisament, çò explica a l’AFP una professora siriana refugiada.
 
Ça que la, fòrça refugiats an totjorn l’espèr de traversar la frontièra e d'anar vèrs Euròpa.
 
 
De condicions deplorablas
 
Plusors organizacions de dreches umans an mostrat lor malfisança a prepaus de las condicions dels camps oficials. De fach, lo camp de Salonica aculhís mai de personas que n'a la capacitat.
 
Los benevòls catalans Marc Garcia e Núria Codornis declaravan sus TV3 que “las condicions son precàrias, sens aiga potabla e amb pauques comuns e recorses”. En mai d’aquò, Garcia denonciava que s’engana lo mond, “qu’an pas encara l’accès als repaisses jornalièrs, als documents, a l’aiga en las dochas, a la collècta de las escobilhas ni mai a la santat”.
 
Dins divèrsas banlègas de Salonica s’aculhís los refugiats dins d’ancianas usinas. La de Sindos, s’emplís d’aiga cada còp que plòu, çò publicava Der Spiegel del temps qu’a Oraiokastro las condicions son identicas o piègers que las d’Eidomeni, e manca de flaçadas, d’aiga e de lach pels enfants, segon Reuters. En mai d’aquò, an enebit l’accès als benevòls.
 
Lo camp de Vagiochori trobèt encara una dificultat de mai, puèi que los refugiats refusèron de s’i installar. Disián que s’agissiá d’un camp isolat, completament embarrat, al mièg d’una tèrra de degun.
 
D’autres deslotjats son estats menats al camp de Nea Kavala, un ancian aerodròm militar, e a Petra Olympus, un camp que, segon l’ONG Better Days, es “un desastre”. Se tracta d’un terren vague cobèrt de grava al pè del mont Olimp. Aquel camp s'adreiça exclusivament als iaziditas.
 
Lo mes passat, Vilaweb documentava la situacion del camp de Kherso, ont, per 3900 refugiats, i aviá solament trenta comuns quimics e cinc dochas sens aiga cauda.
 

You think #Idomeni was bad? Check #Oraiokastro where it seems #refugeesGr will be taken. @syriza_gr@EU_Commissionpic.twitter.com/Y5jXNf7bBJ

— Leil-Zahra Mortada (@LeilZahra) 24 de maig de 2016

 

One of the facilities taking in #Idomeni refugees, in derelict industrial building in Thessaloniki pic.twitter.com/4KTYXAjMcn

— Giorgos Christides (@g_christides) 24 de maig de 2016