Neil Armstrong moriguèt dissabte passat dins sos 82 ans, quand se recuperava d’una operacion del còr. Lo comandant Armstrong es passat a l’istòria de l’umanitat per èsser lo primièr òme de la nòstra planeta que dralhèt la Luna, lo 20 de julhet de 1969.

Armstrong foguèt lo comandant de l’Apollo 11 en aterrant sus la Luna lo 20 de julhet de 1969. En aquela mission, Armstrong e Buzz Aldrin sortiguèron del modul lunar e passèron doas oras e mièja en explorant la Luna mentre que Michael Collins demorava en orbita dins lo modul de comandament. Se faguèt famosa la frasa qu’Armstrong prononcièt en metre los pès sul satellit de la Tèrra: “Un petit pas per l’òme mas un pas de gigant per l’umanitat”. De dificultats amb la ràdio, pasmens, empediguèron de l’escotar plan.
 
Al començament dels ans 70, Armstrong venguèt vicepresident administrador associat per la Division d’Aeronautica dels Burèus Centrals de la NASA, a Washington DC. En aquel luòc, foguèt responsable de la coordinacion e administracion del trabalh de recèrca e tecnologia de la NASA, restacat a l’aeronautica.
 
Après quitar la NASA en 1971, foguèt professor d’engenhariá aeroespaciala a l’Universitat de Cincinnati, fins en 1979. Pendent los ans 1982-1992, Armstrong foguèt president de Computing Technologies for Aviation Inc., a Charlottesville, en Virgínia. Après aquelas cargas, Armstrong venguèt president del conselh director d’Ail Systems Inc., una companhiá de sistèmas electronics a Deer Park, Nòva York.