Lo 1r de junh, al Congrès dels Cònsols Màgers a París, Christian Troadec, cònsol de Karaez (Bretanha) e candidat a l’eleccion presidenciala de 2017, a renduda publica una letra que manda a Anne Hidalgo, consolessa de París, en li explicant perqué non sosten pas la candidatura de París als Jòcs Olimpics de 2024.
 
Vaicí lo tèxt de la letra.

 

“Sosteni pas la candidatura de París als JO de 2014”
 
“Dòna, cara collèga,
 
A l’escasença d’aqueste Congrès dels Cònsols Màgers de França, desiri de vos explicar perqué sosteni pas lo principi de l’organizacion dels JO de París en 2024.
 
Soi lo cònsol d’una comuna que, coma totas las comunas de França, cada an, vei baissar sas dotacions. Aquesta situacion contribuís a cavar encara mai las inegalitats territorialas que venon d’inegalitats socialas. Nòstres conciutadans supòrtan pas mai aquesta situacion.
 
L’organizacion dels JO a París solament refortirà un sistèma a travèrs del qual los investiments màgers de l’estat se fan sus una pichona partida del territòri.
 
Es evident dins lo sector dels transpòrts, un domeni que lo centralisme i torna en fòrça. Es damatjós per totas las regions. Es evident dins lo sector dels esquipaments collectius.
 
Aquel sistèma uèi es arribat a sos limits. Contribuís a far créisser una megapòli e a voidar la rèsta del territòri. Ajuda pas la construccion d’un espaci europèu equilibrat. Ajuda pas l’installacion duna veraia politica de conversion ecologica e environamentala.
 
Aquela concepcion de l’amainatjament del territòri es desueta, inegalitària e carivenda. Agrava sonque los problèmas que coneisson París e la region de l’Illa de França, en justificant, ansin, encara mai d’investiments pagats per totes los contribuents. Lo Grand París, es lo 0,15% del territòri (814 quilomètres cairats) e lo 10% de la populacion (6,9 milions). D’aicí a 2025, l’estat a idèa d’i investir 32,5 miliards d’èuros. Ont son los 292 miliards d’èuros equivalents e los projèctes que serián legitims per los 97 departaments restants? Ont es l’egalitat republicana?
 
Plaidegi per una descentralizacion coratjosa, vertadièra, que done a las regions e collectivitats una capacitat d’innovar, d’exprimir lor dinamisme e de valorizar lors identitats. Ma cambada non es pas ges una desfisança envèrs los parisencs, tot lo contrari. E mai cresi que la qualitat de la vida vidanta dels estatjants de París e de l’Illa de França se melhorariá se sortiguèssem d’aquel centralisme tresanat.
 
Se los JO se devon organizar en 2024, se devon descentralizar.
 
E vos pòdi dire sonque çò meteis a prepaus de l’exposicion universala de 2025.
 
Vos prègui de recebre, Dòna e cara collèga, l’expression de mas saludacions coralas.
 
Christian Troadec, cònsol màger de Karaez.”

 
Font: 7Seizh