Las jornadas 100% occitan que se tengueràn del 7 al 10 de novembre al Fossat (Pedagués) per la quatrena edicion es una formacion integralament en immersion virada de caps a la transmission d’una lenga de qualitat ont les que se venguen perfeccionar son acculhits dins familhas de la valada de la Lesa qu’an “popat la lenga al brèç”.

Enfin un endreit e un moment per viure integralament en occitan, dins un quadre ont la lenga se parla naturalament: una formacion d’occitan 100% en occitan. Aquestas jornadas s’adreçan pas als debutants mès a totis les que se tròban en situacion de responsabilitat lingüistica: les professors, les jornalistas, les animators, totis les professionals o futurs professionals, les militants occitanistas…
 
Quin milhon endreit que l’ostal per aprénguer una lenga coma cal? Le principi es donc le d’una immersion efectiva e eficaça dins la realitat lingüistica populara. Es per aquò que l’albèrgament dels estagiaris se farà en çò de familhas de la valada de la Lesa que parlan un occitan de transmission familiala, «popat al brèç».

Al còp, especialistas de la lenga reconeguts per la sèu fidelitat a l’autenticitat de la lenga occitana dispensaràn un ensenhament precís e de qualitat.
 
Le sosten de la region permet de prepausar una formacion professionala accessibla a totis pel còst minim de 210 èuros (manjar e dromir comprés). Dieumercé le partenariat ambe le CFPO, –e a condicion de se marcar d’ora– la formacion se pòt finançar en passant pel DIF (dreit individual a la formacion).
 
Informacions e inscripcions per e-mail, al telefon +33 (0)5 67 44 35 27  o sul sit web.
 



Olivier Mantel Flahault