Un autobús que tornava en Chequia foguèt  atacat dimenge de ser per un tiraire sus l’autoestrada A7 a la nautor de Saussa de Ròse (Valentinés). Sièis passatgièrs foguèron ferits a causa dels dos còps de fuòc que frapèron lo veïcul. Dins lo bus viatjavan de toristas e un grop de collegians que tornavan d’un viatge escolar.
 
A l’ora d’ara, pas degun a revendicat l’ataca e i a pas cap de persona arrestada. Segon la polícia se tracta d’un fach “isolat”. “I a pas agut ges de revendicacion, mas la pista accidentala es exclusa dau fach que i a dos còps de fuòc”, çò indica a Le Dauphiné Libéré lo procuraire de Valença, Alex Perrin.
 
Lo primièr dels còps de fuòc rompèt lo parabrisa del veïcul, e lo segond traversèt la fenèstra de darrièr, segon Perrin. Los passatgièrs mai pròches foguèron ferits per de brigas de veire, del temps qu’una femna de 45 ans es dins un estat grèu car patís una emorragia seriosa a l’uèlh, çò rapòrta Le Parisien. Totes los ferits son espitalizats a Montelaimar e a Valença.
 
Lo menaire de l'autobús arrestèt lo veïcul sus una aira de repaus dos quilomètres pus luènh del luòc de l’ataca. Segon los primièrs elements reculhits dins lo bus pels tecnicians d’identificacion criminala, las balas se serián tiradas dempuèi un pont. Lo tiraire auriá emplegat de projectils de caça. “Avèm pas ges de pròva que suggerischa qu’aquel autobús siá la tòcha”, çò indiquèt Perrin. Son a contunhar las recèrcas.
 
Los passatgièrs non ferits an contunhat lo viatge vèrs lor país.
 

 

Drôme: jets de pierres sur un bus