Lo govèrn francés exonerarà de tot impòst las diferentas entitats encargadas d’organizar lo Campionat d’Euròpa de Fotbòl —l’Èuro 2016—. O rapòrta lo jornal Les Échos. Aquel eveniment esportiu europèu, l’estat francés l’aculhirà del 10 de junh al 10 de julhet. Al delà de l’IVA (impòst sus la valor aponuda), qu’es pilotat per de règlas europèas, cap de taxa, cap d’impòst e cap d’autra fiscalitat francesa seràn pas prelevats sus l’UÈFA e sas filialas francesas.
 
Aquel jornal precisa tanben que s’es creat una estructura juridica, nomenada “Euro 2016 SAS”, detenguda per l’UÈFA al 95% e per la Federacion Francesa de Fotbòl al 5%, que gerirà tota l’organizacion de la competicion, a l’excepcion de la renovacion dels estadis e de la seguretat. “Gerís l’ensemble dels dreches comercials, del marqueting [...], e de las licéncias de television”, çò explica lo president d’Euro 2016 SAS a Les Échos. S’espèra de beneficis de 900 milions, provenent principalament dels dreches de retransmission.
 
 
L’occitan dins l’Èuro 2016
 
L’occitan serà una lenga presenta e fòrça vesedoira a Tolosa en escasença de l’Èuro 2016. L’eveniment esportiu a previstes quatre matches dins la Ciutat Mondina los 13, 17, 20 e 26 de junh, e la comuna crei qu’es l’escasença de mostrar l’occitan al Mond.
 
La guida del suportaire serà dins qualques lengas europèas dont, tanben, la lenga del país, gràcias a Convergéncia Occitana. “L’enjòc es d’installar l’occitan un pauc pertot dins Tolosa, pas per remplaçar lo francés, mas per marcar l’identitat territoriala e donar un testimoniatge de la nòstra cultura a las gents que venon d’endacòm mai”, çò ditz Jean-Michel Lattes, primièr adjonch al cònsol en carga dels desplaçaments e de la cultura occitana, segon çò que publicava 20 Minutes. Cal esperar, e benlèu demandar, que l’exemple tolosan farà taca d’òli dins las autras vilas d’Occitània qu’aculhiràn l’Èuro 2016, es a dire: Bordèu, Marselha e Niça.