Almens onze personas son mòrtas e trenta sièis son feridas a causa d’un atemptat contra un autobús de policèrs dins lo quartièr Vezneciler d’Istambol. L’atac se produguèt ièr, dimars, a 9h30, quand per carrièras i aviá tot plen de mond qu’anavan al trabalh. Demest los mòrts i a sèt agents de polícia. Segon l’agéncia turca d’informacions Anadolu, s’ausiguèt de còps de fuòc après l’explosion.
 
Lo governador d’Istambol, Vasip Şahi, assegurèt que l’explosion la causèt una veitura bomba. La detonacion se debanèt près d’un comissariat de polícia.
 
Istambol a viscut ongan dos atemptats suicidaris dins de zònas toristicas. Los atemptats son atribuits a l’Estat Islamic e als independentistas curds. Lo darrièr foguèt lo 12 de mai. Uèch personas resultèron de feridas per l’explosion d’una veitura bomba près d’una casèrna militara dins la partida asiatica de la vila.
 
Ara per ara, cap de grop o d’organizacion a pas revendicat l’accion, mas lo govèrn turc soslinha que los atemptats son l’òbra del Partit dels Trabalhadors de Curdistan (PKK). Dins aquel sens lo president turc Recep Tayyip Erdoğan a afirmat que combatrà lo PKK fins a l’apocalipsi. Segon l’agéncia Anadolu, an detengut quatre personas.
 
 

istanbul vezneciler'deki patlama sonrası polis otosu paramparça oldu pic.twitter.com/sK4qhbYtNN

— Baki GÜL mednuce.tv (@analizrojtv3) 7 de juny de 2016

 
 
Las operacions “antiterroristas” contra los curds
 
Lo govèrn turc acusa regularament lo PKK dels atemptats terroristas e, per tant, l’aviacion militara turca efectua de multiples atacs contra los curds, tant dins l’estat turc coma dins los estats sirian o iraquian.
 
Dins aquel sens, l’armada turca ataca de vilas, coma Cizîr o Nusaybin dins çò que lo govèrn nomena d’operacions “antiterroristas”. Segon las organizacions de dreches umans, la majoritat dels mòrts son de civils desarmats.