D’enfants sirians refugiats a la vila turca d’Antiòquia fan los unifòrmes dels soldats de l’Estat Islamic, çò a revelat lo jornal britanic Daily Mail. Los enfants trabalhan 12 oras per jorn e recebon 10 dolars per jorn de trabalh. “Lor emplec es de cóser los unifòrmes que pòrtan los borrèls que los an expulsats de lor país e que, dins qualques cases, an tuat lors parents”, çò explica Geopolítica.cat, que precisa que, demièg los modèls que fabrican, i a los unifòrmes qu’emplegan los comandos d’execucion de l’Estat Islamic.
 
Lo talhièr que lo Daily Mail a descobèrt, que la màger part dels emplegats i son de menors, seriá pas lo sol d’Antiòquia, coma se pòt remarcar sus las 24 fòtos que lo jornal britanic publica.
 
“Es pas mon problèma d’ont son mos clients”, çò assegura Abu Zakour, lo proprietari del sinistre talhièr de confeccion. Es benlèu a causa d’aquò qu’el vend tanben d’unifòrmes a d’autres grops jihadistas.
 
En mai d’aquò, lo Daily Mail publica tanben divèrsas pròvas de l’esplecha infantila en Turquia, ont d’enfants trabalhan en d’emplecs divèrses coma barbièrs o vendeires de botigas. Segon l’UNICÈF, l’80% dels enfants sirians refugiats pòdon pas anar a l’escòla a causa dels estats que los aculhisson.