Actualitats
Lo nuclear es una filièra de futur, segon lo ministre francés del Redreiçament Productiu
Los ecologistas son exasperats per las contradiccions amb los engatjaments de François Hollande
Segon lo ministre francés del Redreiçament Productiu, lo nuclear es una “filièra de futur”. Aquelas declaracions contradison los engatjaments de François Hollande en favor de la reduccion del nuclear en la produccion d’electricitat.
Arnaud Montebourg, ministre del Redreiçament Productiu, diguèt dimenge sus BFM TV que “lo nuclear es una filièra de futur” en tot reconéisser que cal que siá “reequilibrat”.
Lo ministre diguèt que tant pels ostals coma per l’indústria cal “mantenir lo pargue actual de centralas”. La question es de saber “s’anam contunhar d’investir”, çò diguèt. “Per la miá part, considèri que lo nuclear es una filièra de futur”.
Euròpa Ecologia-Los Verds (EELV) mostrèt dimenge de ser lo sieu estonament, en i vesent d’“intencions isoladas”. Jean-Philippe Magnen, pòrtaparaula d’EELV, diguèt a l’AFP que ja o sabián que Montebourg èra prònuclear, mas que “lo president anoncièt un grand debat estatal sus l’energia”. Magnen apondèt que lo president francés, François Hollande, “a preses qualques engatjaments de redusir una partida del nuclear”.
Interrogat sus BFM TV per çò qu’es d’aquelas promessas del candidat François Hollande de redusir lo nuclear, Arnaud Montebourg respondèt que “la reduccion [del nuclear] se conjuga en una eqüacion de doas chifras: la quantitat de çò que se consuma cada an, qu’aumenta, e l’ofèrta”. Lo ministre apondèt qu’“avèm besonh d’energia, e pas tròp cara”, e que “França a una basa extraordinària entre las siás mans que li a permés de bastir la siá indústria”, en se referissent a las centralas nuclearas.
“La nòstra causida d’aver una energia pas cara, abordabla e en quantitat, es estrategica”, çò insistiguèt Montebourg en remembrant que divèrses païses europèus tornavan al nuclear, “quitament lo Reialme Unit, drecha e esquèrra confondudas”.
Del sieu costat, la ministra de l’Ecologia e de l’Energia, Delphine Batho, aviá dich egalament: “pas jamai es estat question ni de sortir, ni d’abandonar lo nuclear”. Lo 25 de julhet, a l’Assemblada Nacionala, Dòna Batho afirmèt que “totes los emplecs de la filièra serián mantenguts”, e en parlar del desmantelament de las installacions nuclearas, apondèt tanben que i aviá “una filièra que nos cal desvolopar”.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
A plan rason lo Monta Borg ! Lo nuclear es una energia "pas cara", estant que l'uranium, lo trasèm de tèrra del biais Françafrica, dins de politicas sempre e sempre unilateralas, vergonhosament desavantajosas a Africa. Per aturar lo nuclear, caldriá, coma o cantava Robèrt Nesta Marley, una Africa Unida — e fòrça mai socialista que lo partit eponim que pretend dirigir França dins una amira esquerrista. Aquela Africa Unida organisariá una mena d'OPEP que federariá los espleitants d'uranium per dire de ne far montar lo còst, car, fòrça car ! Fins a poder cobrar dignitat materiala per totes dins aqueles parçans de tèrra, e fins a far descréisser le recors a l'energia d'extraccion en Euròpa. Los progrèsses que rapòrtan pas al capital s'obtenon sonque a còps de pè al cuol !
E puèi la radioactivitat, aquò te fica lo cancer, que el fa fonccionar l'industria farmaceutica e las mutualas privadas que prenon pauc a pauc la plaça legitima de la securitat sociala. Un sector del futur, qué ! E los volètz, voautres, aquel futur ? Qual ne vòl ?
E quin podèm créser los politicians ? Lo Sarkozy mentre la soa campanha avèva prometut de tirar los soldats d’Afganistan e qu’a hèit lo contrari. Ei un exemple que m’arriba au cap, mès n’i a d’autes …
E ara, qun ministre dirà :
« Lo francés es la sola lenga del futur » ?
Del futur nuclear, de segur...
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari