Los curds de las YPG e las Fòrças Democraticas Sirianas an capitat a barrar la principala rota de provesiment de l’Estat Islamic, venent de Turquia, çò rapòrta Geopolítica.cat, que mençona l’Observatòri Sirian pels Dreches Umans. Lo director d’aquela organizacion soslinhèt divendres passat qu’a “l’Estat Islamic li rèsta solament qualques camins segondaris e pauc segurs que lo connèctan amb la frontièra de Turquia”.
 
Manbij èra una vila estrategica per l’Estat Islamic, qu’assegurava una connexion de la capitala dels jihadistas, Raqqa, amb l’exterior. Es per aquela rota que li arribavan los òmes, las mèrças e las municions...
 
En genièr passat, The Telegraph raportava la molonada de jihadistas britanics que passavan Manbij. Èra “la vila mai europèa de Siria”, çò declarava un estatjant al jornal britanic, que mençonava los “jihadistas britanics, alemands e franceses”.
 
La batalha de Manbij, que se debana a l’ora d’ara, fa partida d’una ofensiva curdosiriana per conquistar Raqqa. D’aquel temps, l’armada siriana del govèrn de Bashshar Al Asad marcha pel sud e lucha ara a Taqba, en liason amb un probable acòrdi entre los Estats Units, que sostenon los curds, e Russia, que sosten l’armada regulara; aital o rapòrta encara Geopolítica.cat que mençona Le Journal de Montréal.