La Comission Europèa a a presentat, amb Facebook, Twitter, YouTube e Microsoft un còde de conducha per enseguir l’incitacion a l’òdi e a la violéncia sus Internet. Aquel còde prevei de levar de messatges o de talhar l’accès a Internet de l’odiaire en mens de 24 oras. En mai d’aquò, los promotors del còde se son engatjats a desvolopar los “contradiscorses” independents e a sosténer de programas educatius en favor de la pensada critica.
 
Los rets socials “son un dels espleches que los grops terroristas emplegan per radicalizar lo mond”, çò declarèt la comissària europèa de la justícia, Věra Jourová: ela ramentèt que las notificacions dels contenguts qu’atempten contra aqueles principis deuràn èsser “precisas e ben fondadas”.
 
“I a una diferéncia clara entre la libertat d’expression e las conduchas qu’incitan a la violéncia e l’òdi”, çò diguèt la responsabla de la politica publica per Euròpa de Twitter, Karen White. De son costat, lo pòrtavotz de Facebook a soslinhat lo ròtle dels usatgièrs per denonciar los contenguts en assegurant que sus aquel ret social “i a pas de luòc per l’incitacion a l’òdi”. Un messatge que Microsoft tanplan i a soscrich.
 
De son costat, Lie Junius, qu’es la directritz de la politica publica e de las relacions amb los govèrns en cò de Google, solinhèt que sa societat a “de sistèmas eficients per examinar las notificacions validas en mens de 24 oras e per levar los contenguts illegals”.