Lo Campionat d’Euròpa de Fotbòl —l’Èuro 2016— es arribat a Marselha amb de grèus incidents e d’afrontamens protagonizats pels suportaires. Las seleccions d’Anglatèrra e Russia s’afrontavan arser dins l’Estadi Velodròm. Èra la primièra partida d’aquelas seleccions a l’Èuro 2016, mas los incidents avián començat qualques jorns abans.
 
Ièr, abans la partida, una autentica batalha aguèt luòc al Pòrt Vielh de Marselha. Los suportaires de las doas seleccions se lançavan las cadièras e las taulas de las terrassas dels bars, coma se foguèsson de projectils. Puèi, los incidents se passèron près del Velodròm. Lo bilanç es, a l’ora d’escriure aquesta nòva, de 31 ferits dont un fòrça grèu. La polícia empleguèt de gases lacrimogèns. Podètz seguir las informacions en dirècte sus La Provence.
 
Divendres passat, la polícia aviá ja detengut sèt personas pendent d’incidents a l’entorn del Pòrt Vielh, ont s’amassavan de centenats de suportaires, en lor majoritat d’angleses, la velha de l’encontre Anglatèrra-Russia; es aquel match que la Ciutat Focèa aviá aculhit aqueste dissabte. E dijòus ja i aviá agut d’incidents al Pòrt Vielh. Un grop d’aperaquí 250 suportaires angleses s’èra batut amb de joves provençals, puèi s’èra batut amb la polícia, en provocant sèt ferits leugièrs: tres suportaires e quatre policièrs, çò rapòrta Le Monde.

Tot aquò se prevesiá. Divendres, Le Monde disiá dins un article que la preséncia de suportaires angleses, coneguts per lor violéncia, inquietava los marselheses.
 

The current clashes in Marseille, Boulogne Boys (PSG) + Russian hooligans vs. England lads pic.twitter.com/ECXZwkD0t3

— Casual Ultra (@thecasualultra) 11 de juny de 2016

 

Un campionat marcat per las caumas e las protèstas socialas
 
Lo Campionat d’Euròpa de Fotbòl —l’Èuro 2016— a començat amb de fòrtas mesuras de seguretat, dins l’encastre de l’estat d’emergéncia, e es marcat per las caumas e las protèstas socialas contra la lei El-Khomri.
 
Lo govèrn francés a previst un desplegament inedit de policièrs. Durant la competicion, que se ten dins divèrsas vilas de l’estat francés fins al 10 de julhet, se mobilizarà aperaquí 90 000 agents entre los quals i aurà de policièrs, de gendarmas e de militars non gendarmas. De volontaris e d’efectius de la seguretat privada i collaboraràn tanben.
 
 
L’occitan dins l’Èuro 2016
 
L’occitan serà una lenga presenta e fòrça vesedoira a Tolosa en escasença de l’Èuro 2016. L’eveniment esportiu a previstes quatre matches dins la Ciutat Mondina los 13, 17, 20 e 26 de junh, e la comuna crei qu’es l’escasença de mostrar l’occitan al Mond.
 
Una guida del suportaire, a Tolosa, s’editarà dins qualques lengas europèas dont, tanben, la lenga del país, l’occitan, gràcias a Convergéncia Occitana. “L’enjòc es d’installar l’occitan un pauc pertot dins Tolosa, pas per remplaçar lo francés, mas per marcar l’identitat territoriala e donar un testimoniatge de la nòstra cultura a las gents que venon d’endacòm mai”, çò ditz Jean-Michel Lattes, primièr adjonch al cònsol en carga dels desplaçaments e de la cultura occitana, segon çò que publicava 20 Minutes. Cal esperar, e benlèu demandar, que l’exemple tolosan farà taca d’òli dins las autras vilas d’Occitània qu’aculhiràn l’Èuro 2016, es a dire: Bordèu, Marselha e Niça.