Se i son acordats dins la Conferéncia de las Nacions Sens Estat celebrada a L’Alguer, la vila catalanofòna de Sardenha.

La Conferéncia de las Nacions Sens Estat se debanèt la dimenjada passada a L’Alguer (Sardenha). Se i amassèron de representants de partits independentistas d’Euròpa, e s’acordèron per crear un ret d’interlocucion permanent format pels departaments internacionals de cada formacion: Solidaritat Catalana, l’Esquèrra Abertzale Basca, lo Partit Nacional Escocés (SNP), lo Sinn Féin irlandés, Independéncia-Republica de Sardenha, lo Partit Sarde d’Accion e Corsica Libera. Al delà, aqueles movements signèron un document qu’explicita lo sosten a las accions concretas de cada movement nacional.
 
Lo document signat a sèt ponches. Primièr, los partits politics independentistas europèus se son conjurats per participar activament a la campanha de l’“òc” per l’independéncia d’Escòcia e per exportar lo sieu modèl e la siá fuèlha de rota secessionista vèrs las respectivas nacions. Segond, pressionar los estats per la ratificacion de la Carta Europèa de las Lengas Regionalas o Minoritàrias. Tresen, sosten internacional a la manifestacion per l’independéncia dels Païses Catalans que se farà a Barcelona l’11 de setembre. Quatren, sosten al desvolopament del procès de patz en Irlanda sus lo camin per una Irlanda unida. Cinquen, sosten al procès còrs de sortida del conflicte, iniciat e impulsat pel movement independentista, e retorn en Corsega de totes los presonièrs politics. Seisen, sosten al procès de patz al Bascoat e al movement Bildu Euskal Herria. Seten, sosten a un procès politic per un govèrn sobeiranista de Sardenha.
 
Las jornadas an agut de debats e de conferéncias sus l’actualitat politica, sociala, culturala, lingüistica e economica de las nacions europèas que se tròban a l’ora d’ara a debatre de lors procèsses de secession o de liberacion nacionala.