Plan polida e cauda jornada per la quatrena fèsta del Fogal Rural la Gabèla que se debanèt lo 28 de mai (fòtos).
 
Fisèl a son engatjament interassociatiu, lo fogal ofriguèt als vesitaires, de matin, una demostracion de judo, per l’associacion Judo Sambo, puèi una novetat amb lo Club Canin 3C, una polida presentacion de Zumba. E per la tantossada, la prestacion d’El Tablao qu’enflambèt Senta Gabèla tota.
 
Aquela fèsta de promocion de las activitats del fogal a subretot botat endavant sos actors amb sa cantèra, sos musicians que nos interpretèron de “musica de cambra” (una autra novetat del fogal), sos talentoses pintors, sos fotografs, sas brodairas, sos fervents occitans, los calandrons, etc., totes aqueles afogats ufanoses de mostrar lor activitat.
 
Lo castèl aguèt pas un momenton de pausa, las brasucadas e lo bar tanpauc!
 
Tota la jornada se debanèt lo torneg de “quilhas al malhet” amb d’afiscats jogaires venguts de còps de plan luènh; e vist l’interès dels badaires —que d’unes l’ensagèron—, aquel jòc tradicional, ancian mas encara viu, poirà èsser un jorn de retorn a Santa Gabèla!
 
Sens desmembrar l’animacion d’Olivièr e Melissa que desespèran pas d’entraïnar un jorn los gabeleses dins una endemoniada “flashdance”, qui sap?
 
La cultura jos totas sas formas, es al Fogal Rural de Santa Gabèla que se debana!
 
 
 
 
Magalí Barceló