La justícia de Qatar a condemnat a un an de preson una femna olandesa qu’aviá denonciat que l’avián violada. En març passat, la femna, que passava sas vacanças en aquel emirat, anèt a la polícia per denonciar que l’avián drogada e violada dins una ostalariá. La polícia l’arrestèt a ela. Ara l’an jutjada e condemnada per téner de relacions extramatrimonialas e serà deportada quand se formalizarà la senténcia, çò a raportat aquesta setmana l’ambaissadora olandesa a Qatar, Yvette Burghgraef Van Eechoud.
 
L’òme qu’ela l’acusèt del violament es estat condemnat a 100 foetadas per adultèri e a 40 de mai per aver begut d’alcòl. Dins lo jutjament el se declarèt colpable d’aver tengut de relacions consenditas mentre qu’èra ebri.
 
De son costat, la femna olandesa denoncièt que foguèt drogada dins un club de centre de Dawha. “Ela se remembra que se revelhèt dins un apartament desconegut, ailà s’avisèt que l’avián violada”, çò declarèt son avocat, Brian Lokkollo.