“Quau ten la lenga, ten la clau”, las paraulas de Joan-Pèire Belmon, pairin del FestiVous, retroniguèron coma un leitmotiv pendent tota la manifestacion. Una clau vèrs una richesa culturala, viva, actuala: ne testimònian los quinze espectacles gratuits que se succediguèron a Ilonça (Val de Tiniá).

De cinèma amb los documentaris de Roxane Petitier, N’Auderem Parlar, e de Thierry Paladino, La Maquina, de concèrts amb Aurèa, Nux Vomica, Lu Raubacapèus o Lo Mago d’En Castèu, de dança amb Li Arèndolas, de teatre amb la companhiá La Cigale e Le Théâtre Niçois de Francis Gag, de campaniers a l’entorn de Marie-Chantal Castel, de musica de charriera amb la revelacion de las Escarchababis, de conferéncias.

Chal apondre los expausants: Monique Fougeron, l’IEO de Gap, Macarèl, las edicions Baie des Anges, L’Échoppe Nomade, los acordeons Bonifassi, Jean-François Philip; los artistas Nicole Chassaing, Jérémy Taburchi, Claude Cagnol, Paul Pacotto o Jean-Pierre Ficucciello; los autors Joan-Luc Domenge, Francis Ciamous e Jacqueline Cagnol; las demostracions del juec de la morra, un concors de cosina, dos cents placas de sòca, tres cents pans banhats, cinquanta placas de pissaladiera, de chants e de broç.

Vaquí! Chaliá pas mens qu’aquò per alegrar los centenats d’espectators venguts assistir al rendètz-vos indefugible de la cultura occitana dins lo parçan. “Aqueste rescòntre es possible ren que gràcias a l’investiment de la municipalitat, mas sustot gràcias a la volontat d’un trentenat de benevòls que s’engatjan per que la fèsta siá un succès”, çò resumís lo cònsol Richard Lions.
 
La clau serà doncas ben gardaa fins a l’an que ven per una cinquena edicion!

 
 

PC / FM / DS