Tula: la primièra edicion del festenal Balad’Òc a ben capitat
Gràcias a una còla dinamica al dintre de la comuna e a la collaboracion d’associacions de lenga e cultura occitanas
Nadau a Tula faguèt lo plen d'espectators
La primièra edicion del festenal Balad’Òc foguèt organizada a l’iniciativa de l’adjunta en charja de l’environament per la vila de Tula. Se passava del 1r al 4 de junh dins aquesta vila, foguèt una reüssida gràcias a una còla dinamica al dintre de la comuna e a la collaboracion d’associacions de lenga e cultura occitanas.
Mai d’un eveniment marquèt aquel festenal en començant pel debat plan interessant amb Amic Bedel aprèp la projeccion del filme La Sèria.
Los rencontres a l’EHPAD de las Fonts, entre los residents e los collegians de Selhac, los escolans de Navas e de Selhac, amassèron 100 personas.
I aviá entre 250 e 300 personas al concèrt de la sala de las musicas actualas per aplaudir Gilles de Becdelièvre, Bernat Combí e La chorale de la Manu. Abans lo vernissatge de l’exposicion “Camin de Trobar” del CIRDÒC, Luc de Goustine faguèt una conferéncia a la mediatèca intercomunala Eric Rohmer sus un tèma que mestreja plan, los trobadors, abans de cedir lo fons Caireforc Ventadorn suls trobadors a la mediatèca. Las lecturas pels collegians de Selhac e l’espectacle d’Olivièr Pairat sus Bernat de Ventadorn encantèron los espectators d’aqueste endrech.
Lo dardalh de la cultura occitana e son influéncia dins lo monde foguèron meses en valor d’un biais remirable per Alem Surre-Garcia totjorn a la mediatèca.
A l’iniciativa de Bram FM e en preséncia de las ràdios associativas Decibel FM, Radiò Vicomté, Radiò Pac, RCF, i agèt un platèu ràdio en occitan sul merchat de la gara amb de nombroses convidats coma La Galoche de Condat, Bernat Combí, Jan de Nadau. De chançons de la corala de Selhac, de rencontres gromands, de musicas, de convèrsas “Aicí se platussa en lenga lemosina”, de danças ritmèron aquel merchat atal coma lo del cai de Baluza.
Una passejada istorica e literària menada per Domenja Descomps, anciana professora d’occitan al collègi de Selhac e escrivana, vegèt la preséncia d’una seissantena de personas sus las traças d’occitanistas tulauds coma Joannes Plantadis, majoral del Felibritge e istorian de Tula, Joan Mouzat poèta tulaud, Loïsa Paulin poetessa albigesa qu’ensenhèt 18 ans a Tula, lo canonge Josep Ros poèta e filològ occitan, Margarita Genès qu’aviá escrich en 1893 per la sesilha inaugurala de l’Escola Limouzina [Escòla Lemosina] un long poèma, Lou Felibrige deus Auzeus [Lo Felibritge deus Auseus], Joan Audiau professor a HEC, istorian de la literatura e especialista de la poesia occitana, e François Bonnelye.
Enfin, lo festenal Balad’Òc s’achabèt amb un balèti en debuta de serada (grasilhadas sus l’èrba a la broa de la ribièra) e pel concèrt de Nadau que rechampèt mai de 700 personas a la sala de l’Auselon totas en comunion amb lo grope mitic de Bearn.
Òsca als organizaires e a l’annada que ven!
Estève Clerc
Platèu de ràdios associativas lo dissabte matin
Etiquetas
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Es una bona debuta per un festivau que se vòl durar dins lo temps. Plan merces aus organisators e au trabalh daus occitanistes.
A! si los monuments istoriques de Paris avian estats a Tula, i aura dos milions de toristas per an e los coresians serian riches. mas los coresians coma belcòp d'occitans e de provinciaus an estat obligeats de botar lòr sac sus l'eschina per 'nar trabalhar alhors, a Paris tot en rebant de devenir riches.
Es achabat aquel temps. Es temps de nurir una novela mentalitat que vòl pus d'aquela capitala que pren tot e que rend dau tot en sostener la candidatura Troadec tant pis si es pas pron ecologista, sociala, filosofica.
Avem pron far los vaslet e los d'Artanhan que nos raportet ren. Olande e Chirac an pron far lo vaslet dau grand capital, ilh tanben. Es temps de pensar a se, a la Coresa, a l'Occitania, à nos reirs e nos raiçs.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Cada còp que nos venon de nòvas occitanistas del nòrd del país nòstre aquò me fa un rai de solelh dins lo còr
Es una bona debuta per un festivau que se vòl durar dins lo temps. Plan merces aus organisators e au trabalh daus occitanistes.
A! si los monuments istoriques de Paris avian estats a Tula, i aura dos milions de toristas per an e los coresians serian riches. mas los coresians coma belcòp d'occitans e de provinciaus an estat obligeats de botar lòr sac sus l'eschina per 'nar trabalhar alhors, a Paris tot en rebant de devenir riches.
Es achabat aquel temps. Es temps de nurir una novela mentalitat que vòl pus d'aquela capitala que pren tot e que rend dau tot en sostener la candidatura Troadec tant pis si es pas pron ecologista, sociala, filosofica.
Avem pron far los vaslet e los d'Artanhan que nos raportet ren. Olande e Chirac an pron far lo vaslet dau grand capital, ilh tanben. Es temps de pensar a se, a la Coresa, a l'Occitania, à nos reirs e nos raiçs.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari