Los scientifics an trobat d’evidéncias de tridimita dins las donadas enviadas pel robòt Curiosity qu’es sus Mart. La tridimita es un tipe de mineral que sus la Tèrra es associat amb las explosions volcanicas.
 
Dins un article publicat dins la revista Proceedings of the National Academy of Sciences, la còla del Centre Johnson de a NASA, dirigida per Richard V. Morris, descriu que Curiosity a trobat una mòstra qu’après qualques analisis fa reanalisar tota l’istòria de la formacion de la Planeta Roja.
 
Fins ara, los scientifics cresián que l’istòria geologica de Mart èra estada fòrça tranquilla, en comparason amb la de la Tèrra, e se cresiá que Mart aviá pas de placas tectonicas cambiadissas que causèsson los tèrratrems e las explosions volcanicas. Las evidéncias volcanicas trobadas sus la Planeta Roja se presentavan coma un flux constant, a la faiçon dels volcans de las illas d’Hawaii. Mas ara, la trobalha de la tridimita fa reanalisar tota l’istòria geologica de Mart.
 
Lo robòt Curiosity es a percórrer lo cratèr Gale dempuèi l’an 2014 e arunan comencèt de captar e d’extraire de mòstras d’una zòna nomenada Marias Pass. La còla d’investigacion observèt una composicion de las ròcas que semblava de suggerir de silici, e ne sometèron una mòstra a d’analisis de rais X. Lo resultat es un nivèl naut de tridimita. Es probable qu’aquela tridimita se siá formada dins un autre endrech de la planeta e siá estada menada dins lo cratèr, eventualment per un ancian riu. Deu èsser de material expulsat o format per de volcans explosius, mas, cossí se formèron en abséncia de la tectonica de las placas?
 
Aqueles resultats son solament lo començament de la reanalisi de fòrça projèctes de l’istòria de Mart. Òm cèrca de saber cossí se pòt crear la tridimita sens l’intensa calor d’una violenta erupcion volcanica.