Lo jornal numeric francés Rue89 a causit las cinc proposicions mai estonantas per sortir de la crisi. Se prepausa de fusionar totes los deutes estatals dels païses de l’èuro, de los restructurar e quitament de fòrabandir Alemanha de l’èuro.
Lo jornal francés Rue89 a fach una seleccion estonanta de cinc idèas o proposicions qu’an fach d’especialistas de prestigi internacional per salvar l’èuro. Amb lo títol “Cinc idèas fòlas (pas totas estupidas) per salvar l’èuro”, l’article prepausa d’idèas que qualques unas son pas tan fòlas. “Qualques expèrts an suggerit las solucions mai fòlas, mas tanben las mai simplas e radicalas. Fins ara an predicat dins lo desèrt. Vaquí cinc exemples.”
Primièra idèa: fusionar totes los deutes dels estats e los restructurar
Paul Jorion es pas economista de formacion, es antropològ, mas es vengut a l’economia per passion. Foguèt un dels pauques que prevegèron la crisi de las “subprimes” abans 2008. Dins lo sieu blòg, Jorion prepausa una solucion fòrça radicala per resòlver lo problèma d’un sol còp.
Segonda idèa: redusir totes los deutes publics europèus a 20%
Nicolas Dufourq es director financièr de Cap Gemini. Dins Rue89, escriguèt una proposicion fòrça originala: redusir totes los deutes publics europèus, quitament l’alemand, a 20%.
Tresena idèa: una granda taxa sul patrimòni
En 2010, l’èx-primièr ministre italian Giuliano Amato faguèt una proposicion plan simpla: redusir lo deute italian de 120% a 80% del PIB estatal en fasent una poncion, d’un sol còp, del tèrç del patrimòni dels italians mai rics.
L’economista liberal francés Jacques Delpla escriguèt la siá idèa dins una cronica publicada de LesÉchos, ont prepausa una taxa excepcionala de 15% aplicada a la totalitat del capital nacional: actius financièrs e immobilièrs.
L’argent extrach d’aquelas doas proposicions seriá per pagar lo deute public. Se poiriá pagar la taxa amb d’argent o amb de títols de proprietat.
Quatrena idèa: separar lo deute bon (blau) del marrit (roge)
Dins lo jornal Les Échos, lo meteis economista Jacques Delpla prepausèt de separar, per d’emissions futuras, lo deute en doas partidas. D’un costat, un deute senior (blau) que sa qualitat serà identica a las obligacions federalas alemandas e que serà d’un maxim de 60% del PIB; serà totjorn pagat abans los autres deutes publics e serà implicitament avalorat coma AAAA. De l’autre costat, un deute roge (lo que despassarà 60% del PIB), junior, e susceptible d’èsser pas pagat.
Cinquena idèa: fòrabandir Alemanha de l’èuro
Aquela d’aquí, es una idèa pensada per John Prout, èx-responsable de la sala d’operacions del Crèdit Comercial de França. L’idèa se publiquèt sul blòg de Clyde Prestowitz, president de l’Institut d’Estrategia Economica estatsunidenca. Lo rasonament que fa Prout es que lo problèma de l’èuro es pas la feblesa de la periferia, mas la fòrça excessiva d’Alemanha.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Tornar sus la lei de 73 es pas possible per duas rasons : la primièra es qu'es ja fait (dins los 90's), la segonda es que çò que nos forobandís ara de far nòstra pròpria moneda, es l'aricle cabi-pus-lo-qual de Lisbona. Doncas, al nivèl europenc. Tornar sus aquò se pòt pas far que via l'Euròpa. E n'es pas question, ara.
La cinquena idèia es un pauc limita, pas ni mai ni mens que de sortir la Grècia.
La tresena, soi estonada qu'es estada prepausada per un liberal. Dempuèi quora un liberal s'en prend al capital ?
Las autras son interessantas pr'amor que seguisson un pauc totas las meteissa idèia : far fauta sus lo deute, en partida o totalitat. Que que ne siá, refusar de pagar lo deute a una consequéncia : serà pas possible per un brave moment de nos far pretar d'argent per cap de banca ! Doncas, aurèm de tot bias a redusir nòstre budgèt.
De l'eurò, ne nos chautam. Son os Europèus, totes (99%), que vos salvar amb sas lengas, totas (100%). Aquò dit, per o salvar tot, e mai la lor moneda, ai fait un sòmi : "Hollanda passa a esquerra" !
E tornar sus la lei de 1973 entà revénguer a la situacion d’abans, quo ne’us a pas gratolhat ?
E ua solucion „a l’islandesa” tampauc ?
Demandar lo son avís au director financièr de Cap Gemini, per contra, Rue89 n’ei pas mai çò d’un còp èra ….
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari