Ua còlha de geològs a trapat en Suècia un meteorit fossilizat que queiguèc sus era Tèrra hè 470 milions d’ans. Eth meteorit ei estat nomentat Öst 65 e apertié a ua familha de meteorits que bombardèc era nòsta planeta en aquera epòca. Era trobalha ei estada publicada ena revista Nature Communications aguesta setmana.
 
“Jamès avíem trapat un meteorit coma aguest. E sus era Tèrra an queigut mès de 50 000 metorits”, çò diguec Birger Schmitz, geològ dera Universitat de Lund e cap der estudi que s’ei publicat. “Quan dus asteroïdes apròp de Jupitèr e de Mart collisionèren hè 470 milions d’ans, divèrsi tròci arribèren ara nòsta planeta e Öst ei un d’aqueri”.
 
Mès aguest meteorit se fossilizèc après era sua caduda sus era Tèrra coma ac hèn es uassi des dinosaures o des animaus encara mès ancians, coma es trilobits. Eth meteorit ei estat trapat en ua peirèra e non ei estat abans qu’un geològ l’a podut examinar que s’ei descubèrt era sua importància. Ath delà d’aquerò, es geològs l’an podut classar coma un fossil fòrça particular pr’amor que cap de meteorit trapat abans sus era Tèrra ère coma aqueth.
 
 
Un meteorit fòrça particular
 
Era còlha geologica qu’a hèt era descubèrta a trapat qu’aguest navèth meteorit a ua composicion quimica fòrça desparièra dera des autes arròques queigudes deth cèu. Per tant, an classat aqueth meteorit coma ua trobalha unica sus era Tèrra que pòt ajudar a compréner encara mès era origina deth nòste sistèma galactic atau coma era formacion geologica dera Tèrra.
 
E pr’amor qu’es descubèrtes extraordinàries an de besonh d’evidéncies tanben extraordinàries, era còlha de scientifics a consacrat es darrèri quate ans a estudiar aqueth meteorit. Atau pogueren arribar a conéisher era epòca qu’arribec sus era Tèrra e tanben era sua origina espaciau. Eth meteorit avie coma origina un lòc plaçat entre Jupitèr e Mart.
 
Atau, era còlha de Schmitz arribèc ara conclusion qu’aqueth nau meteorit trapat en Suècia ei ua trobalha unica sus era Tèrra. “Es isotòps de cròme son estats era clau entà comprene’c tot”, çò confirmèc Schmitz. E tanben an descubèrt qu’eth metorit pair d’a on gessec siguec totauments destruit e que non pòt quèir cap de meteorit coma agueth jamès sus era nòsta planeta. Era conclusion tanben ei susprenenta: eth tipe de meteorits que queiguèren sus era Tèrra hè 470 milions d’ans ei en tot desparièr des meteorits que quèn aué.
 
 
 
 
Christian Andreu