Amb 350 quilos d’explosius, demandan al govèrn italian de desblocar un projècte de 200 milions d’èuros que poiriá garentir los lors emplecs.

Un centenat de menièrs se son embarrats la matinada de diluns passat dins una mina de carbon al sud de Sardenha, a qualques 400 mètres de prigondor, per protestar contra lo possible barrament de la mina.
 
Per se far ausir, los trabalhadors de l’entrepresa Carbosulcis decidiguèron de s’embarrar amb 350 quilogramas d’explosius.
 
La lor protèsta se produsís abans la reünion que se debanarà al Ministèri del Desvolopament Economic italian en fin de setmana per tractar las diferentas entrepresas en crisi, que Carbosulcis n’es una.
 
Los menièrs demandan que se desblòque un projècte de 200 milions d’èuros per far dins l’estructura de la mina un depaus destinat a emmagazinar de CO₂ en collaboracion amb l’entrepresa electrica Enel. Aquel projècte poiriá garentir los lors emplecs.
 
“Sèm prèstes per demorar aicí fins qu’ajam una responsa del Govèrn qu’assegure lo futur de la mina. I demorarem indefinidament”, çò diguèt Sandro Mereu, un dels manifestants.
 
Aquela meteissa mina foguèt ja ocupada pels menièrs en 1984 e 1993, e tanben 1995 quand demorèron cent jorns embarrats dedins.