Un jovenet de catòrze ans, filh del cònsol d’Orgon segon qualques mèdias, a reconegut èsser lo qu’a causat l’incendi de divèrses centenats d’ectars a l’entorn d’Orgon (Crau). Lo fuòc es ja contrarotlat pels pompièrs mas encara es actiu.

Lo suspècte, originari de la vila, filh del cònsol segon qualques mèdias locals, l’avián ja mes en examen a la fin de julhet perque auriá ensajat de causar un incendi.
 
Cal que las declaracions del jovenet sián confrontadas als rapòrts tecnics dels enquestaires de la cellula Vulcan, activada per aquel incendi, compausada de pompièrs, de gendarmas e d’agents forestièrs. Lo procuraire de la Republica a Tarascon, Christian Pasta, deu far una conferéncia de premsa abans o après portar lo menor a la justícia.
 
L’incendi comencèt la nuèch de dissabte a dimenge près d’un camping d’Orgon e foguèt atisat per de bofadas de vent, de mistral, qu’anavan fins a 70 km/h. Lo fuòc a ja cremat mai de 400 ectars de vegetacion, mitat de bòsques e mitat de tèrras agricòlas, e a destrusit dos ostals a Senaç.
 
“L’incendi es jos contraròtle mas es encara actiu”, çò diguèt ièr lo prefècte de region Hugues Parant, en precisant qu’aviá “percorregut qualques 900 o 1000 ectars, mas o a pas tot cremat”, sus las comunas d’Orgon, Aiguiera e Senaç.
 
S’es fach qualques òbras de forestatge, de creacion de pistas e d’espargiment pendent la nuèch de dimenge a diluns per facilitar l’accès dels secorses. D’avions Canadair e d’elicoptèrs bombardièrs d’aiga trabalhavan encara diluns a amorçar las darrièras flamas.
 
Lo grop bearnés Ba’al e la còla de Dètz TV se trobavan en un festenal ailà e son estats evacuats del camping d’Orgon. La còla de la FIMÒC a parlat amb eles e lèu, La Setmana, Ràdio País e Ràdio Occitània, entre d’autres mèdias, vos ofriràn mai d’informacions.
 
Aquel incendi es lo mai important qu’es arribat ongan en Occitània. A La Canau (Medoc), 650 ectars de pinhadar foguèron cremats lo 17 d’agost e, al País de Fois, 500 ectars de vegetacion foguèron destrusits qualques jorns puèi.